Hadien ba la dep thung, mano ban sumar ia ki dieng?

Bah RM Shabong

Ka la long ka jingshongshit jong ka sngi thung dieng ha kylleng ka Ri Khasi Jaintia, ha kaba la iohi ba ki khynnah skul, ki hap ban mih sha jaka phlang lem bad ki riam skul jongki, na ka daw ban ia thung dieng.
Ym tang katta, la iohi ba ki shakri sorkar, ki heh ki hain, naduh u myntri rangbah bad ter ter, ba ki ia bunkam ban ia thung dieng lut khoit, lane kumba don kiba antad ba da ki million tylli ki dieng ki dieng, yn thung ha kine ki sngi, kum ka jingrakhe ia ka sngi pynneh mariang.
Hynrei ka jingkylli pat ka long, mano ban sumar ia ki dieng, hadien ba la dep thung bad la kito kiba thung, ki don ne em ia ka jing kitkhlieh ban sumar ia kitei ki dieng, ne ka shu long noh tang ka kam tamasa ba shisngi, ban thung bad hadien kata, ban ailad ia ki blang, ki masi bad ki jyrmie ba kin pyniap noh ia kitei ki dieng kiba dang khie lung.
Ngim tip ruh haduh mynta, ba na kine ki jingthung dieng kiba man u snem, la katno tylli kiba la kylla dieng bah bad sa katno tylli kiba la iap noh bad katno shuh ka jinglut ka pisa u paidbah, na bynta uwei u dieng bad ka jingtih ia kawei ka thliew thung dieng lem bad kiwei ki jing donkam.
Ka jing kitkhlieh ia katei ka kam, kam dei ban long sha ki khynnah skul, sha u myntri rangbah, sha ki ophisar bad kumta ter ter, hynrei, ka la dei ban don ka bhah na ka tnat khlaw, ka tnat pynneh khyndew bad kiwei ruh ki tnat sorkar bad ia katei ka kam, dei ban aiti sha ka tnat khlaw, ka tnat pynneh khyndew bad khamtam ia ki shnong, kiba don kito ki dieng, ba kin ia kitkhia bad ban peit ba ki dieng kin san kin plung bad kin pyn jyrngam ia ka mariang kaba la syllen.
Kam dei ruh tang katta bad ka jingthung dieng, kam dei ruh ban long ha rud surok, namar ba ka surok kam ju map bad ka ju jia khah khah, ba ka ju pom noh ia ki dieng, kiba don ha rud, namar ba hap pynheh shuh shuh, lane ba ki pynwit ia ka leit ka wan bad kumta, ka jingthung dieng, ka dei ban long kham kyrpang ha ki law shnong, ki law kyntang bad ha ki rud wah lane ki rud bad lada ka long kumta ki dieng kin long ka jingmyntoi ia kito ki khlaw ba la ri bad sumar kyrpang.