Hadien ba la dep ka Khristmas, yn leit Delhi biang ka MDA ban dawa pynlong ain noh ia ka ILP

Shillong: U Chairman ka State Planning Board, u bah Lambor Malngiang u la ong ba ka sorkar Meghalaya Democratic Alliance (MDA) kan leit biang sha Delhi hadien ka aiom Khristmas na ka bynta ban buddien ban pynbor ia ka sorkar pdeng ba u President ka ri un soi ne pynbna ban pyntreikam da ka Bengal Eastern Frontier Regulation 1873 ne ka Inner Line Permit (ILP) ha ka jylla Meghalaya hadien ba la mynjur bad pdiang da ka iing dorbar baroh hynnin ka sngi.

Haba kren sha ki lad pathai khubor myn hynnin ka sngi, u bah Lambor u la ong, “Naduh ka sngi ba nyngkong, ngi la iakren iamir jingmut lang, kam don kano kano ka jingartatien. Ngi la shim ia ka rai lang baroh”. 

    “Ngin leit biang da ka MDA sha Delhi hadien ka Khristmas ban buddien ia ka rai ka ing dorbar halor ka ILP”, la ong u bah Lambor.
    U la ong ba ka kynhun na ka MDA ka la wan jngoh na Delhi lem bad ki sengbhalang. “Haba ngi iakren bad u myntri kam pohiing ka ri u Amit Shah, ngi ong ba ngim kwah Citizenship Amendment Act 2019 (CAA) ha Meghalaya bad u myntri rangbah ka jylla ruh ula kren jur ha u Amit ban sngap ia ka sur jong ki paidbah ka jylla”, la ong u bah Lambor bad bynrap, “Ngi hap ban iaid katkum ka sur jong ki paidbah”.
    U la ong ba ka don ka jingsngew kmen hadien ba u Amit Shah ula pynbna ban pyllait ia ka CAA na ka Sixth Schedule hynrei ym shym la hun namar ba ka jingpynlait ka long tang 97 na ki jaka ha ka jylla. “Ngi la iakynduh biang ia u Amit Shah ngi la dawa ba dei ban pyllait lut”, la ong u bah Lambor.
    U la ong ba ki don kiba wohnia hynrei ka jingiaid lynti ka long kaba jop watla ym pat jop lut haduh mynta.
    “Ngi la rai ban shim rai ia ka ILP da ka ing dorbar hadien ba la iakren na Delhi. Peit kum ka Manipur kala rai haduh saw sien da ka rai ban dawa ILP bad ngi sngew ba dei ban shim da ka rai da ka ing dorbar ban iada ia ki paidbah ka jylla”, u la ong.
    U la ong ba u Amit Shah ula kular ban wan biang hadien ka Khristmas ban iakynduh biang bad un peit ia kaba bha tam ia ka jylla Meghalaya.
    Ha kajuh ka por, u bah Lambor u la ong ba  ka jingdawa ia ka ILP ka mut beit ban pyndam ia ka CAA ba kan nym treikam ha ka jylla.