Nongpoh, 10 Lber: Ka Dorbar Shnong Lum Nongthymmai, Byrnihat ha Ri Bhoi, ka la pynkup burom kaba kyrpang ia u Bah Sosthenes Sohtun, uba dei u MLA Jirang bad uba la jop kum u MDC ka Jirang ha ka Ilekshon jied nongmihkhmat sha KHADC bad kaba dang shu dep shen.
Ia ka prokram ban pynkup burom ia u Bah Sosthenes Sohtun, la pynlong ha king dorbar ka shnong Lum Nongthymmai, Byrnihat, ha kaba ka nongrim kaba la pynlong ia ka shnong, ba kin pynkup burom ia u Bah Sosthenes Sohtun, ka dei ba ka shnong ka sngewkmen eh, ba kum u briew uba shong ba sah napoh katei ka shnong, ha kaba hadien ba u la long kum u MLA bad mynta u la shah jied pat ban long kum u MDC ka Jirang Constituency.
Haba iadei bad katei ka jingpynkup burom ia u Bah Sosthenes Sohtun, ki nongkren ha katei ka sngi pynkup burom, kiba kynthup naduh u Bah Iaineh Wahlang, Rangbah Shnong, ha ryngkat ka jingdon ki nongialam Seng Samla Shnong bad Seng Longkmie, ki la pynpaw ba kum ka shnong hi baroh kawei, ka sngew sarong eh, ba u briew uba na ka shnong, u poi haduh katei ka kyrdan, kata ba un long kum u MLA bad mynta kum u MDC.
“Kum ka shnong hi ngi sngew, ba u Bah Sosthenes Sohtun, u la long kum u Mawlynnai hapoh ka shnong, namar ka jinglong jong u MLA la arsien kynthih bad mynta sa kum u MDC, la wan pynsngew sarong eh ia ki paidbah ha ka shnong bad ha ka Jirang Constituency hi baroh kawei” ong u Bah Iaineh Wahlang.
Lah ruh ban kdew hangne, ba u Bah Sosthenes Sohtun, hashwa ba u long kum u MLA bad MDC ka Jirang Constiteuncy, u la long teng ruh kum u Rangbah Shnong ka shnong Lum Nongthymmai, ha kaba tang ha ka kyrdan Rangbah Shnong ruh, u la lah ban wanrah shibun ki kam pynroi hapoh ka shnong.
Haba iadei bad katei ka jingpynkup burom da ka shnong, u Bah Sosthenes Sohtun, u la sngewngeh eh ia ka shnong, ba ka la kynpaw kyrpang ban pynkup burom ia u, ha kaba lyngba ki jingkren jong u, u la kyntu ia ki paidbah hapoh ka shnong, ba kin ialong kawei bad ka jingiaburom bad jingiaieid iwei ia iwei pat.
Ha ka jingiakren jong u, u la ai ka jingkular ia ki paidbah hapoh ka shnong bad ia baroh ki shnong kiba hap ha Jirang Constituency, ba un trei shitom na bynta ban wanrah ia ka roi ka par ha ka Constituency hi baroh kawei.
Phi don ban ong eiei?