Hadien 9 bnai, ioh kem ia u HNLC ba phet na NEIGRHIMS

Shillong,2 Iaiong:
Ki pulit ka Special Task Force jong ka Kol kata ha ka sngi hat majai ki la ioh ban kem ia u Phyrnai Swer, u dkhot ka HNLC uba ki pulit ki la thwet jur bha la khyndai bnai mynta. U SP ka East Khasi Hills u bah M Kharkrang u la ong ba u Phyrnai u la phet krad na NEIGRHIMS Hospital naduh ka 17 tarik u naitung 2013, bad ki pulit ki la thwet jur ia u ha ryngkat ka jingiatreilang bad ki tnad syntiat jong ka jylla bad ka sorkar pdeng, la ong ba ki pulit Kolkata ki la ioh jingtip ba utei dkhot ka HNLC u don ha Chittaranjan Avenue kaba don ha Kolkata bad ki pulit ki la leit ban khynra ha katei ka jaka ha kaba ki la ioh kem ruh ia u ryngkat bad uwei pat u paralok jong u , uba la tip kyrteng kum u Nand Kishore Thakur. Hadien ba la ai jingtip ka kynhun pulit na Shillong ki la hiar sha Kolkata ban wanrah ia kitei ki ar ngut sha Shillong na ka bynta ban tohkit.
Lah ban kdew ba la kem nyngkong ia u Phyrnailang Swer ha ka 13 u nailar 2004 ryngkat bad 8 ngut kiwei pat ha ka por ba ki la thaw ia kawei ka kynhun runar kaba la tip kum ka Retrieval of Indigeneous United Forum( RIUF), la pynngat ia u hapoh ka kyndon ain MPDA bad hadien ba u la lait na ka jingshah set phatok u la sdang ban ia treilang synrop synrop bad ka HNLC, ong ka khubor pulit.