Shillong: U bah Titostarwell Chyne u MDC ka Sohra Constituency, mynta ka sngi ula shah jied kum u Chief Excutive Member ba thymmai ka Khasi Hills Autonomous District Council khlem ka no kano ka jingia leh pyrshah na ka liang iatei.
U bah Titostarwell Chyne u ba la long u MDC ha kine ki ar sien, mynta ka sngi u la shah jied kum u CEM khlem kano kano ka jingiakhun pyrshah.
Hadien ka jing bym trei kam pura ka Khasi Hills Autonomous District Council ha kine ki 4 bnai ba la dep na ka liang u Lat ka jylla u la khot ban pynlong ia ka dorbar kyrpang mynta ka sngi.
Mynta ka sngi ha ka por 10:00 baje mynstep ka la don ka jingiatynjuh bor ha ka dorbar kyrpang jong ka KHADC hapdeng ka United Democratic Alliance ba la ia lam da u bah Titustarwell Chyne bad United Democratic Forum ba la ialam da u bah Latiplang Kharkongor.
Na ka liang ka UDA ki ba don 20 ngut ki MDC ka la ai da ka jingbym shaniah shuh (No-confident Motion) ha ka ba ka la lah ban pynkhyllem noh ia ka EC ba la ialam da u bah Latiplang Kharkongor.
Ha ka por 12:00 baje ki la pynlong ia ka jingthep kyrteng ia ki nongia khun na ka bynta ka kam CEM bad u bah Titostrawell u la leit ban thep kyrteng ha ryngkat ka jingia synran lang ki MDC ka UDA kat ban a ka liang ka UDF kim shem la don mano mano ba leit ban thep ia ka kyrteng ban ia khun ia kane ka kam CEM.
Ha ka 1:00 baje nohphai sngi ki la pynlong ia jingjied ia u CEM thymmai ha ka ba u bah Titostarwell Chyne u la jop khlem kano kano ka jingiakhun pyrshah.
Na ka liang u bah Titostarwell hadien ka jingpynbna ia ka jingjop u la ong ba ka ka jingbym buh jong ka liang iatei ia u kyrtong ban iakhun ia ka kam CEM ka long ba ki pynpaw ia ka jingshaniah bad ka jing kwah ia trei lang jong ki bad ka EC ba thymmai ha KHADC.
Phi don ban ong eiei?