Hadien 24 kynta, sngap jar noh ka UDP

Bah RM Shabong

Haba shu peit na ka rai hak dak jong ki nongialam UDP, da kaba ki buh por 24 kynta ban jubab U bah Paul Lyngdoh bad U bah Teibor Pathaw, la iohi, kumba ka jingthmu ka long ban pyntwa wat ia u lumbah jong ka seng UDP ruh; hynrei mynta haba ka la iaid lait haduh 70,80 kynta ruh, la iohi ba katei ka jing byrthen jong u laren, kam wan rah slap eiei ruh.

Ki nongialam jong ka seng UDP, ha kaba sdang la imat, kumba ki don ia kajuh ka jing rhah ban mait briew, kumba leh ka seng NPP, ha kaba ki mait ia u lamphang ka dorbar KHADC; hynrei (imat) kham hadien, ki sdang ban sngewthuh ba katei ka jingmait jubor kam don jingmut eiei ruh em bad la iohi, kumba ka la pynsniew pynban ia ka seng NPP bad ba kam don jing myntoi ruh em ia ka kynhun kwah thaw EC jong ka synrop UDP, NPP bad ka dei lehse halor katei ka mat, ba ki sdang mynta ban aste bad na kiei ki dak kiba paw, la imat kumba ki kwah toi ban khring bad wat ban aiti ia ka shuki Chief Executive Member (CEM) ha utei u hati sawkuna jong ka seng UDP.

Ngi la thoh bunsien, ha kane ka kolom ba ka jing khyllem jong ka EC ha Khasi District Council, ka shong ha u nongialam jongka bad haba ula shah pynhap, ba un shu bat rdin ia katei ka jinglong nong ialam kam don jingmut shuh bad lada dei ba ka mih kum katei ka sur, naduh ba ka khyllem ka EC, kumta mynta kan jin da la wan biang ka kynhun synrop UDP, NPP ha katei ka Council.

Hynrei ha ka jaka, ba kin pynbeit, ki sdang ialeh lushia bad ki la ia king bakla ia ka syrwa naduh u myntri rangbah, u myntri rangbah ba ar, u lamphang dorbar, namar ba ki kwah pynshong jubor ia U CEM barim bad mynta, la iohi, kumba ka jing thynrang jongki, ka la nang jngai bad kan dang shimpor kham slem (wat la ngim kyntait ba kin sa wan suki, lada ki bujli noh, da uwei pat u nongialam).
Ka UDP, ka la dei namarkata ba ha kane ka kynti, kan shongthait aram noh shipor bad ki nong ialam ba kham ha khlieh jong katei ka seng, kin pyn thanda noh shwa ia la ka jong ka bor jabieng bad kin ailad ia ki arngut ki dkhot shimet jong ka Council, ba kin ialam ia ka Executive Committee bad mano ban tip, ba lada ka biang ka nia ka jutang bad ka dud bad ka ngap, lehse ba kitei ki arngut, kin kwah iatem bom pynban kham hadien.