Hadien 24 kynta; poi hajar ki nong pynrung WE Card jong ka TMC

Shillong:Tang shisngi hadien ka jing pyllait paidbah jong ka Chairperson jong ka seng All India Trina mool Congress (AITC), ka Mamata Banerjee, kata ha ka 13 tarik jong u Nohprah, ia ka skhim ban ai pisa kyrpang ia baroh ki longkmie ha ka jylla Meghalaya hi baroh kawei, ba la tip kum ka Women Empowerment Schemes (WE card), da ki hajar ngut ki long kmie na ka jylla, ki la pynrung kyrteng ialade na bynta ban ioh ka jing myntoi na katei ka skhim, lada ka parti Trinamool Congress ka ioh ban synshar ia ka jylla Meghalaya ha ka elekshon ban wan ha u snem 2023.

Ka jing pynrung kyrteng ka la sdang naduh ha ka 13 tarik Nohprah, ha kaba ka jing pynrung kyrteng jong ki longkmie ha ka jylla haduh ka 14 tarik Nohprah ka la tam ia ka 1000 ngut tang ha ki 24 kynta ba la dep ban pyllait paidbah ia katei ka skhim ka ban ai jing myntoi ia ki longkmie jong ka jyllam ba kin tei ia ki longïing long sem lyngba ka jing pynkup bor kyrpang ia ki long kmie ha ka jylla Meghalaya lyngba ka WE card, kaba dei ka thong ba ha khmat bha jong ka seng Trinamool Congress.

Kane ka skhim kaba ailad ia baroh ki longkmie ha ka jylla Meghalaya ba kin pynrung kyrteng ia lade, la ki dei kiba trei, ki nong bylla sngi, kiba shu shongïing ruh ki lah ban pynrung kyrteng ia lade na bynta ka jingmyntoi kaba kin sa ioh 1000 tyngka man la u bnai bad 12000 tyngka shi snem lada ka parti All India Trinamool Congress kan ioh ban thaw sorkar ha ka jylla Meghalaya ha ka elekshon ban wan ha u 2023.