Hadien 2 taiew yn tian bishar ia ka kam Parliamentary Secretary

Shillong, 5 Naitung:
Ha ka 4 tarik u Naitung ka sorkar jylla ka la thoh Aphidabit kum ka jing ia aireng ia ka Public Interest Litigation (PIL) kaba la ujor pyrshah ia ka sorkar, halor ka jingthung kam Parliamentary Secretaries ha kane ka jylla. Halor katei ka bynta ka High Court ka la buh sngi hadien ar taiew ban tian bishar ia katei ka kam.
Ha kaba iadei bad katei ka aphidabit na ka liang u muktiar jong u nongujor u la thoh ba u la ioh pdiang ia ka kopi jong ka aphidabit kaba la phah da ka sorkar jylla bad u la pyntip ba u donkam katto katne por ban peit bniah shuwa bad lada donkam un sa thoh aphidabit.
Lah ban kdew ba ia ka PIL la ujor da u bah Madal Sumer uba shongbasah ha Jowai, bad u la ujor PIL ha u iaiong mynta u snem ha kaba u la dawa ba dei ban mait kyrteng ia ki MLA kiba bat ia ka kam Parliamentary Secretary namarba ka long be-aiñ katkum ki kyndon ka riti synshar.