Hadien 2 taiew yn bishar ia ka jingdie jaka tad ka sorkar sha ki babu sorkar

Shillong, 14 Rymphang:
Ka kashari High Court ka la buh 2 taiew ban bishar ia ka PIL ka CSWO pyrshah ia ka jingai jaka tad ha ka dor T. 1 tyngka shi sq ft sha ki babu sorkar ha Shillong Thymmai ha Maw diangdiang.
Ia kane la pynbna da ka Division Bench ka Meghalaya High Court ha ka sngi Thohdieng.
Ka PIL ba la ujor da ka president ka CSWO ka Kong Agnes Kharshiing ka la pynlong ia ka jingbishar hynne ka sngi ba kynthup ia u Chief Justice ka Meghalaya High Court, u Justice PC Pant bad u Justice SR Sen.
Ka CSWO ka la rai ban ujor ia ka rai jong ka sorkar jylla ban ai jaka tad sha ki babu sorkar ha katei ka Sor Shillong ba thym mai kaba la wanrah ia ka jingduh noh kaba T.78.42 lak. Ka sorkar ka la ai jaka sha ka Civil Service Officers Housing Cooperative Society Limited bad kane ka kam jong ka sorkar ka la paw ha ka kaiphod jong u Comptroller and Auditor General (CAG) kaba kut ha u 31 tarik Lber, 2011.
Ka kaiphod jong u CAG jong u snem 2011, ka la ong ba kane ka jingleh jong ka sorkar ka la wanrah ia ka jingduhnoh ia katei ka pisa.
Ha kajuh ka por ka Kong Kharshiing ka la ujor ban ialeh pyrshah ia kane ka rai jong ka sorkar jylla.
Ha ka jingujor ka CSWO ka la ong ba ka jingai wai ia ka jaka sorkar na ka bynta 99 snem, kam dei kaba ju leh ba la leh da ka sorkar Meghalaya katkum ka Assam Land and Revenue Regulation, 1886.
“Ka long ka jingshisha ba don katto katne ki dkhot jong ka Revenue and Disaster Management kiba dei ki dkhot jong ka Civil Service Officers Housing Cooperative Society Ltd. Kane ka la pymnlong ia ka jingsuba jur ban aiwai haduh 99 snem kaba long pyrshah ia ka jingeh jong ka sorkar jylla Meghalaya”, la ong ka kong Kharshiing.
Ka la kdew ba ia ka jaka ym ju dei ban aiti da ka jingmynjur jong kiwei ki bor namar ba ka donkam ia ka jingmynjur jong ka Cabinet Sub Committee hynrei ia kane ka jaka, ym shym la leh da kane ka lynti.
“Ka jingai jaka sha ki babu sorkar kiba dei ki dkhot jong ka Civil Service Officers Housing co-operative society Ltd., ka la pynkhein ia ka Meghalaya Land Transfer of land (Regulation) Act, 1971 namar ba ki don ki dkhot jongka co-operative society ki bym dei Khasi”, la ong ka Kong Agnes.