Nongpoh, 08 Naitung: Ka sorkar Megha laya lyngba ka tnad ka kam pohiing, mynta ka sngi da ka jingkmen kaba khraw ka la lah ban plie paidbah noh ia ka District Jail kaba don ha ka Shnong Mawsyntai, Ri Bhoi Distict.
Ia kane ka Disrtict Jail kaba don ha Maw syntai, ha kaba nynkong eh ka sorkar ka la mang pisa ha ka jinglut kaba T. 5.50 klur, hynrei namar ka jingdonkam ban dang pynbit pynbiang bad kham pynheh ka sorkar ka la mang tyngka biang haduh ba ka jinglut ka la poi sha ka 6.24 klur bad ha kajuh ka por ka la shimpor haduh 12 snem ban pyndep noh ia kane ka District Jail.
Ha kane ka sngi la wan ruh ban plie paidbah ia kane ka District Jail da u Myntri Rangbah ka sorkar jylla, u Dr. Mukul Sangma kum u kongsan, ha ryngkat ka jingdonlang jong ka Myntri ka tnad Pohiing, ka Kong Roshan Warjri, u Dr. D.D Lapang, MLA ka Nongpoh Constituency, u Dr. Celestine Lyngdoh, MLA ka Umsning bad kynthup ruh ia u DG ka Prison, u Vijay Kumar bad u DG ka Law & Order, u SB. Singh.
La pynphuh pynphieng ruh ha kane ka sngi da ka jingdon jong ki ophisar pulit na ka District, ki ophisar na ki tnad sorkar bapher bapher bad kumjuh ruh ki paidbah ka thain Ri-Bhoi, kiba la wan ban sakhi lang na ka bynta ban plie paidbah ïa kane ka District Jail.
Haba kren kum u kongsan ha kane ka sngi, u Myntri Rangbah ka jylla, u Dr. Mukul Sangma, u la ong ba la slem ka sorkar ka la thmu ban pyndep ia kane ka District Jail, hynrei na ka daw jong ka pla tyngka, kumta ka sorkar kam lah ban pyndep ha ka por kaba biang.
U la ong ruh, ba ka jingdon jong ki District Jail ha man ki District hapoh ka jylla, kan ai jingmyntoi ruh ia ki Koidi kiba sah hapoh jong ki Jail, namar dei ha ki Jail ba bunsien la lap ba ki Koidi ki kylla na ka jinglong sniew sha ka jinglong bha kaba iadei bad ka imlang sahlang, ong u Dr. Mukul Sangma.
Shuh shuh, la ong ba ka jingplie ia kane ka Jail ka long ban wan rah ia ka jingtreikam kaba ba bit ba biang halor ki kam jong ka ain ban ioh ia ka jingbishar, namar haba don ka jingbishar kaba bit ba biang kan don ruh ka jingpyntreikam hok ha ka synshar ba ki paidbah kin ioh ia la ka hok, u la bynrap.
Ha kane ka sngi la ioh jingkren ruh da ka Kong Wajri, ha kaba kum ka Myntri ka tnad ka ka kam pohiing, ka Kong Warjri, ka la ai ia ka jingkhublei kyrpang naduh ki ophisar bad ki para nongialam ha ka sorkar, ha kaba da ka jingiatrei lang hapoh ka jingialam jong u Dr. Mukul Sangma, tad haduh ba ki la lah syndon ban plie paidbah ia kane ka District Jail ha Mawsyntai.
Ka la ong ruh, ba ka daw hi kaba pynlong ia ka sorkar ban pynkloi ia ka ban plie noh ia kane ka Jail, ka dei ban pynduna noh ia ka jingkhapngiah ki koidi ha ka District Jail kaba don ha Nongbah Shillong, ka la bynrap ruh da kaba ong “ka jingdon jong ki Jail ha man la ki District kan iarap ruh ban pynduna ia ki kam sniew, namar ka Jail hi ka long kum ka jaka ban pynkylla kaba mut ia ki nongkam sniew” ong ka Kong Roshan Warjri.
Ka Kong Roshan Warjri, ka la iathuh ruh ba kumba ka long mynta ki koidi kiba don ha ka Shillong District Jail, kim duna ia ka 300 ngut, kumta ban pynduna ia ka jingkhapngiah ha katei ka Jail, ka sorkar ka la rai ruh ban pynkynriah noh kumba 50 ngut ei ei ki Koidi sha kane ka District jail, ka la bynrap.
Ha kane ka sngi la ioh ruh ia ka jingkren da u Dr. D.D Lapang bad u Dr. Celestine Lyngdoh, kiba la pynpaw ia ka jingkmen hadien ba ka sorkar ka la shim khia ban pyntreikam noh ia kane ka District Jail kaba don ha Mawsyntai, na ka liang u Dr. C Lyngdoh, u la pynpaw ruh ha khmat u Myntri Rangbah bad ka myntri ba dei peit ia kane ka Jail ba kin pyrkhat ruh ia ki paidbah ka thain, haba iadei bad ka thungkam thungjam ha ki kam kaba la lah ban trei da ki nongshong shnong katei ka thain.
Ha kane kajuh hi ka sngi, hadien ba la dep ban plie ia ka District Jail, u Myntri Rangbah ka jylla u Dr. Mukul Sangma, ha ryngkat ka Kong Roshan Warjri, u Dr. DD Lapang, Dr C Lyngdoh ki la leit ruh ban plie ia ka Cultural Complex cum District Library Hall kaba don ha Nongpoh.
Phi don ban ong eiei?