Hadien 117 kynta, la ioh sei ia ka samla lud, na ka iing kaba twa, na ka jingkhie jumai

Haduh 117 kynta, ka thei samla lud, kam shym la iap satia bad la ioh ban pyllait im ia ka, da ki nongiarap, kiba na Ri Bilat. Katei ka thei samla, ka shah ban, haduh 5 sngi kynthih, ha ka jingtwa jong ki iing ki sem, na ka jingkhie jumai bad katei ka dei ka Ikbal Cil, kaba la lait im, na ka jingtap jong ka iing kaba shiphew mala, ha ka nongbah ba shathie jong ka Turkey, ka Kahramanmaras.

Katei ka jingkhie jumai, ka la shim haduh 22 hajar ngut ki briew ha ki bynta ba shathie jong ka Turkey bad sa 3,500 ngut kiba iap ha ki bynta ba shatei jong ka Syria.

Uwei pat u rangbah, uba kyrteng U Minik, ula lait im, na ka jingshah ban khyndew, hynrei, ula lyngngoh, ba u don marwei ha katei ka jingshah ban bad ula ong “Nga don ka tnga ruh. Shaei ka don. Sngewbha wad lem ia ka ruh”.

Ki don mynta 80hajar ngut kiba dang shah sumar ha ki hospital bapher, na ka jingmynsaw, na ka jingkhie jumai bad ki don sa ki million ngut, kiba la shong khlem iing khlem sem, na ka daw jong ka jingtwa ki iing ki sem bad ba la wan, sa ka jingkhriat kaba jubor haduh katta katta.