Habakkuk

AIS Suja

Habakkuk, u dei u briew, udei u nongiathuhlypa jong u Blei ha ki snem 605-597 B.C. U Habakkuk u shakri u Blei u la iathuhlypa pyrshah ia ka jingpynjot ia ka Judah (Israel) ha shwa ban pynjot ia ka da ki nong Babylon ha u snem. 587 B.C. Ha shwa ia kata, ka la don ka thma ki nong Babylon pyrshah ia ki Carchemish kiba la shah rem. Kumta la plie ka lynti ia ka Babylon ban rung ha Judah bad knieh ia ka bor synshar bad ki Babylon ki la pyllong ka New World Power bad synshar donbor.

Ka Hima Judah kadon hapdeng ki jingeh ka tyngkhuh jingeh namar ki nongshong shnong bad ki nongsynshar jong ka ki im da kaba mane bleithaw. Kumta u Blei u la shah ia ka jingjot ban hap halor jong ki nong Judah namar kim shym la kylla kaba mut wat haba u Habakkuk u la ialap ha ki. La pyndap ia ka Ri Judah da ki jingleh jubor jingshah lute jingumsnam, ka sorkar ka la tlot ki ain ki kanun kim trei kam, ymdon shuh ka jingbishar kaba hok la pyndap ia ka Ri bad ia ki Nongsynshar satang da ka bamsap (corruption) ki paidbah ki iam ki ud.

Haba ki nong Babylon lyngba u syiem Nebukhadnessar ki la synshar donbor kumne, u shakri u Blei u Habakkuk u la bitar shla bad u khuslai jur ban iohi ia ka jingshah lehbein ki paid ki raiot khamtam haba la ialam ia ki da ki nongbabylon ban mane bleithaw. Ha kum kata ka por, u Habakkuk u la duwai bad daka jingbitar ha u Blei u da ong- “Ah Trai katno slem ba men pyllait ia ngi naka jingle jubor? Balei ba me pyllong ia nga ba ngan iohi iakaba kum kane ka jait jynjar? Kumno ba Me lah ban shu peit ia kaba kum kane ka jingle bymdei? Ka jingjot ka jingle jubor ki don baroh sawdong jongnga bad ka don ka jingialeh ba jingiakajia ha kylleng. Ka ain ka tlot bad kam myntoi eiei bad ym ju don ka jingbishar hok, ki briew ki long kiba sniew ki ioh kaba kham bha ban ia kiba hok, bad kumta ia ka jingbishar hok la pynjngut….. Ah Trai naduh kaba mynnyngkongeh Me long u Blei, u long u Blei jong nga, uba khuid uba na bymjukut. Ah Trai u Blei jong nga u nong iada, Me la jied ia ki Nong Babylon bad pyllong ia ki, kiba khlain khnang ba ki lah ban pynshitom ia ngi. Hynrei kumno Me lah ban shah ia kine ki riew shukor ki briew kiba sniew? ki khmat jong Me ki khmied palat kat ban peit ia kaba sniew bad memlah shah ban peit ia ki briew ba leh bymdei. Te balei Me sngap jar jar katba ki dang pynjot ia ki briew kiba kham hok ban ia ki? Kumno Me lah ban pyllong ia ki briew kum ka dohkha lane kum ka kynhun ki khniang ki bymdon nongsynshar ban ialam ia ki? Ki nongbabylon ki kem ia ki briew da ki khwai kum badei ki dohkha ki ring iaki na ki jar tong dohkha jong ki ki pyndap ia ki da kiei kiei kiba bha tam. Hato kin pyndonkam iaki da ki waitlam junom bad iai pynjot ia ki jaidbynriew khlem jingisynei? Ngan kiew ia ka ja ap phira jong nga bad ap ban khmih ia kaei kaba u Trai un iathuh ha nga (ha u Habakkuk) ban ong, bad kaei ka jubab ba un ai halor ka jingmudui (petition) jong nga (Ong u Habakkuk) . Habakkuk 1:2-2/ 12-17/ 2:1.

U Habakkuk u la iasaid bad u Blei. U Blei u jubab mar khongpong ia u Habakkuk. Ki Judah ki long ki briew kiba la jied jong u Blei, hynrei ki pyrshah iaka ain Blei.

Ngi iohi ba u Blei u shah ia kine ban jia, namar u lah ban leh katba u mon ha bneng ne khyndew ha duriaw bad ha ki jingjylliew baroh. Salm 135:6. U Blei u leh ia kiei kiei namar kadon ka jingpalat ha ka Ri. Proverb 28:2. Ka donkam ia ngi ruh ban duwai ban iasaid ia la ka Ri, namar u Blei u tip u iohi bad iohsngew kumno u paid ka Ri u long, aiu ki Nongsynshar ki leh, kumba la jia ha Judah hyndai. Ko ki Habakkuk to duwai ia la ka Ri. Amen.