Haba u bom, u leit rung ha dukan sha; khynniuh ka longkmie ar met,bun kiba ryngkoh na jingkhang iit

Shillong:Ki longkmie khasi ki ba ju die sha bad ja, ha ka jaka ieng kali, kaba mar pyrshah bad ka SBI Branch Shillong ki la kylla long ki langkñia, hadien ba ki bor pulit ki la wan ban pynbthei da u Stun Grenade, hapoh ka dukan sha jong kitei ki longkmie.

Kane ka jingjia ka dei ka ba la jia mynta, ka sngi, ka 4 tarik u Nailur 2023, katba ki pulit ki la beh thong ia ki dkhot jong ka seng HITO, ki ba la phet bad mareh kulmar, hadien ba ki shah kawang Stun Grenade ha ki pulit.

Katkum ka jingioh jingtip ba ha kane ka dukan die sha, ba shah kawang bom ladon lang ruh kawei ka longkmie kaba armet. Kane ka jingleh jong ki pulit, ka la pynrit mynsiem ia ki paidbah kiba shong bam ja bad dih sha ha kane ka dukan, khamtam eh ia ki trai jong kane ka dukan.
Donbok ba kine ki trai dukan ki pyndonkam ban shet ja da u rnga, jin lada ki shet da ka gas, ym tip shuh, ia kaei, ka ban jia ia ki paidbah.

Ha ka jingiakren bad kawei ka longkmie, kaba die sha lang ha kane ka dukan, ka la iathuh ba kynsan kynsan, katba kiba wan bam ja, ki dang ia bam, ki pulit ki la wan ban kawang beit da u bom hapoh ka dukan.
Ka la iathuh ruh ba ha ka por ba bthei u bom, baroh ki ba don ha ka dukan sha ki la kiew bad rynsied kulmar na kamra shet ba don ka jingkhang rit shapoh. “Ka jingkhynñiuh bad ka jingtieng ngam lah batai shuh namar ngam pat lah ruh tang ban iaid ba ki kjat ki kyiuh” la ong kawei ka longkmie. “Ngi lah sepei lut ki jingbam baroh hapoh dukan, namar ngi dang shu plie shen ha ka por kumba 8 baje mynstep bad haduh 1 baje ngi dang ia sdang ban ia die, hynrei la wan noh ki pulit ban kawang bom”. Kumta ki trai jong kane ka dukan, mar mar ki la leit ban ujor da ka ejahar ha Sadar Police Station.

Na ka liang jong u bah Thomas Pasah, u nongialam jong ka Khun Hynniewtrep National Awaken Movement (KHNAM), u la pynrem jur ia kane ka jingleh jong ki pulit, ban kawang tear gas ia katei ka dukan bam ja.
U la ong ruh ba ka jingkawang tear gas ha katei ka dukan ka dei ka jingthmu ban pynmynsaw, ym shuh ban pynpra ia ki paidbah ki ba iakhih.