“Haba phin iohi ia kiei kiei!”

AIS Suja

“Haba phin iohi ia kine kiei kiei, to tip ba ka long HAJAN, ha ka jingkhang”. Mathaios 24:33. U Jisu u ong – haba ngin iohi ia kiei kei, ki jingjia, ka mut ba ka por bakhadduh tam kan long. Kiei kita kiei kiei ba la ong da u Jisu?

Nyngkong eh u Kren ha ka pharshi ia u dieng dumbur kaba thew ia ka Ri Israel. Namar kane ka Ri ne ka jaid bynriew ba shisien mynwei (before) ka la sakma, la pynsaphred kylleng ia ki na ka daw ka jingbym kohnguh ia kaba u Blei u la kren katkum na ka Kitab Deuteronomi kaba ong – “Bad u Trai un pynsakma ia me hapdeng ka jaid bynriew baroh naduh bakut haduh bakut ka pyrthei: te hangta men shakri ia kiwei pat ki blei ia kiba ma me lymne ki kpa jong me kim ju tip, kiba da u dieng bad u maw kein” Deuteronomi 28:64.

Ki Israel ki la jied ia ka jingbym kohnguh ki la jied hi ia ka jingtim (Cursing). Bad da kane ka jingtim kaba ki la jied ka la wan hap halor jong ki, la synshar ia ki da kiba bun ki syiem bad ki hima ka pyrthei. La pynjot ia ka Temple jong ki ha u snem 70 A.D, la ring mraw ia ki sha kylleng ki ri ka pyrthei, ki la mane ia kiwei pat ki blei da u dieng u maw kumba la thoh, namar ki la kyntait noh ia ki hukum u Blei.
Hadien ba u Blei u la pynshitom ia ki, u la lum pat ia ki Israel na kylleng sawdong pyrthei. Ia kane la iathuh ha ki Salm u David kaba ong – “U Trai u tei ia ka Jerusalem u lum lang ia kiba la tait ki Israel” Salm 147. Ia kane ka jingiathuhlypa ruh lah pyndep. Ki Israel ki la ioh pat ia la ka jong ka ri la pynbna ia kata da ka UNO ha u snem 1948. Naduh u 1948 ki Israel kum u dieng dumbur ki la khie lung ki la sei soh sei sla, ki don ha ka ri lajong, ki long kiba shait bakhlain ba pahuh baphai kiba khlain bor bad ka jingstad kaba tam mynta ha pyrthei bad kawei kaba ki dang duna ka long ba kim pat ioh hukum ban pynieng ia ka Temple kaba Lai.
Haba phin iohi ba ka Israel ka la khraw bor, to tip ba ka long hajan kata kaba kut noh kiei kiei. Kane ka long ka DAK sha ka pyrthei bad ka Israel ka long ka baje jong ka pyrthei ban tip ia ka por. Bad ka jingkhraw bor ka Israel mynta kam dei kaba jia ryngkhat hynrei ka don ha ka jingthmu jong u Blei, bad kata ka long ba ka Israel ka long ka Tiar thma jong u Blei ha ki sngi ban wan jong kane hi ka pateng. Kumta ka Israel ka nud ban ieng marwei ha kum kata ka por. Ka mut ba u Blei u la pynkhreh thma pyrshah ia ki ri kiba ialeh pyrshah bad ki bym pdiang ia u.
“Kane ka pateng bynriew kan ym leit noh tad ynda la pyndep noh ia kine kiei kei baroh” Mathaios 24:34. Mynta, haba ka Israel ka long kaba khlain mynta kam mut kan kut tang hangta. Namar kane ka pateng bynriew kan ym pat kut tang hangne, hynrei hap ban pyndep ia kiei kiei baroh. Kata ka long ban pyndep pynurlong shwa ia ka shitaiew ba la ong da u Daniel 9:27. Kane ka shitaiew ka thew ia ki 7 snem haba la bynta ia ki mar 3 snem shiteng, 3 snem shiteng bad hapoh kane ka por kan don ka jingiateh jutang lamler bad u Khrist lamler ia kaba la ong ha u Isaiah “Ngi la pyllong jutang bad ka jingiap bad ka dujok ruh ngi don jingiakut …… ka jutang bad ka jingiap yn pyndam noh” Isaiah 28:15-18. Kumno yn pyndam noh ia kane ka jutang? U Daniel la ong – “Hamar kaba shiteng jong kata ka taiew (3 ½ snem) un pynduh ia kata ka jingknia (Stop the sacrifices)” Daniel 9:27. Hangno yn pynsangeh ne pyndam noh? Tang shu la kut ki 3 snem shiteng ba nyngkong. Namar ha kaba sdang jong kine ki 7 snem, yn pynieng shwa ia ka Temple kaba Lai ia kaba u Blei u khlem hukum ban pynieng hynrei ka dei ka jingkwah jong ki Jiw (Israel) hi ba yn ioh pyndep ia ki jingiathuhlypa ba la ong – “Uta uba ialeh pyrshah uba pynsarong ialade pyrshah ia baroh ba la ju khot u Blei, u da leh Blei ialade” 2 Thessoloni 2:4. Une u dei u briew ka POP.
Tang shu pynieng pat ia ka Temple ka mut ka sdang artat ki 7 snem ba la ong da u Daniel “Ka Shitaiew” bad hapoh “ka shitaiew, ne ki 7 snem, yn plie ruh ia ki 7 ki jingpyndait (Seventh Seals), ka Kulai Balieh, Kulai ba Saw, Kulai iong, Kulai Bthuh, ka Duwan, ki jingjia ha ka sngi (Sun) u bnai (Moon) ki khlur (Stars), jingpynpaw 6:1-17 / 8:1-5. Kine ki jingjia kin jia hapoh kita ki 7 snem katkum ka Kitab Jingpynpaw. Kam pat kut tang hangne, hynrei kin kut tad ynda la pyndep ia ki 30 sngi, ba la ong da Daniel 12:11 ban long baroh 1290 sngi. Kumne “Bad naduh ka por ba yn shim noh ia ka jingainguh thang bad ba pynieng ia ka jingijli ba pynjot, kan long 1290 sngi”.
Kumta ki jingjia kiba shyrkhei kin jia hapoh ki por ba 1290 sngi kein ia kaba u Jisu u la ong – “Ka kordit bah bym pat ju long naduh myndang long ka pyrthei” Mathaios 24:21.
Hap ban pyndep ia kine “Kiei kiei” ki kam kiba u Blei bad u soitan (Lucifer) kin hap ban pyndep.
Sa kawei pat hap ban pyndep ka long na ka bynta ki 45 sngi basah ban long 1335 sngi ba la ong da u Daniel 12:12. Kaba mut haba khein lang 1290 + 45 sngi = 1335 sngi. Ki 45 sngi, ki por ban pynsleh ia u Jisu Khrist ban synshar ia kane ka pyrthei. Daniel 9:24 / Daniel 7:11-14 / Loukas 1:31 – 33.
Bad haba la kut ki 1335 sngi, u Daniel u ong – “Suk uta uba iai ap uba kot haduh 1335 sngi” Daniel 12:12.
“Kumta, kane ka pateng bynriew kan ym leit noh, TAD YNDA la pyndep ia kine kiei kiei baroh” Mathaios 24:33.
Hadien ba yn pyndep ia kine kiei kiei baroh, u Jisu Khrist un synshar kein 1000 snem hangne ha pyrthei, na Jerusalem. Jingpynpaw 20:1-6 / 1 Korinth 15:25. “Ka bneng bad ka khyndew kin leit noh, hynrei ki KTIEN jong nga KIN YM LEIT NOH SATIA”.
Ia kine baroh yn pyndep, hangta kan wan kaba kut jong “kiei kiei” baroh.
“Ko khun hep, ka long ka por kaba khadduh” 1 Ioanis 2:18.
Amen.