“Haba phin iohi ia ka jingijli ba pynduh!”

AIS Suja

Ka ktien u Blei ka ong kumne: “Ynda phin iohi ia kata ka jingijli bapynduh” Mathaios 24:15. Ka jingijli ba pynduh, the abomination that causes desolation, kaei kane?

Kane ka dei kata ba ka ong shaphang jong ka da u Daniel u Nongiathuhlypa, ba ka DA IENG HA KA JAKA BAKHUID, standing in the Holy Place” Mathaios 24:15. Kumno u Daniel u la iathuhlypa halor kane? “Bad shitaiew (7 snem) un pyllong ia ka Jutang baskhem bad kiba bun: bad hamar kaba shiteng kata ka taiew (3 ½ snem), un pynduh noh ia kata ka jingknia bad jingainguh bam (sacrifices): bad halor ka thapbniang ki jingijli un wan uwei u ban pynjot (abomination that cause desolation)” Daniel 9:27.

Ka mut hangne ba ka Israel haba kan pynieng pat ia ka Temple ba Lai (Third Temple) kan sa iateh jutang jingiasuk shwa bad ki ri Arab baroh kiba don ha Middle East, bad un mih uwei uba donbor ban pyniasuk ym da ka UNO lane kano kano ka ri khrawbor pyrthei namar ka Israel kan ym pdiang kulmar. Uta un wan – “Un rung hapoh kata ka ri (Israel) ba don burom, bad bun ki ri yn pynkyllon” Daniel 11:41.
Uta u riewkhraw ne Khrist lamler un rung ha Israel bad ka jingthmu jong u ka long ban pynkyllon, hynrei un leh ialade kum uba hok eh bad ki Israel kin ia teh jutang jingiasuk (namar mynta ka Israel ka la khraw bor palat) bad un shah ia ki ban pynieng ia ka Temple ba Lai (Third Temple) kaba ki la duh noh naduh u snem 70 A.D.
Haba u la shah ban pynieng Temple ha jan ka Dome of Rock, ki Jiw ne Israel kin tei pat, bad hapoh ki 3 ½ snem ki Jiw kin ioh ban pyndep niam jingknia da ki mrad (red heifer) katkum ka rukom ki kpa tymmen jong ki hyndai. Hynrei ha ki 3 ½ snem ba Ar pat une u nongpynjot un pynsangeh ia ki Israel ban ai jingknia. “Bad hamar kaba shiteng (3 ½ snem) un pynsangeh noh ia kata ka jingknia bad jingainguh bam. (In the middle of the 7 years he will put an end (stop) the sacrifices and offering) Daniel 9:27.
Kumta, ynda u la dep pynsangeh ia kata ka jingknia kaba 3 ½ snem jong ki Jiw, un leit shong ma u pat ha kata ka Temple ha Jerusalem, ka ktien u Blei ka iathuh ia kata – “Uta uba ialeh pyrshah bad uba pynsarong ialade pyrshah ia baroh ba la khot Blei lane ba ju mane: kat ba u shong ha ka Temple u Blei ha Jerusalem, u da leh Blei ialade” 2 Thessoloni 2:4. Une u dei uta u briew jong ka pop u khun ka jingjot kein, uba iateh jutang bad ka Israel da ka jingthmu ban pyniap ia ki baroh phar. Dei ia kane ka por ba ka Bible ka ong ha ka Gospel u Mathaios 24:21 kaba ka kordit bah kan long bym pat ju long naduh myndang long ka pyrthei bad kam long shuh ruh”.
Te shwa ia kane, u Jisu u la pynkynmaw ia ka pharshi u Diengdumbur kaba ong – “Haba ka nat jon u ka la khie lung, bad sei sla , phi tip ba ka lyiur ka la jan” Mathaios 24:32. U Diengdumbur u thew ia ka ri Israel, ka ri Israel ka la khie lung naduh 1948 ka la sei ia la ka sap ka phong bad ka bor ban synshar dalde ialade. Mynta ka Israel ka la long ka ri kaba khlain bor ha pyrthei ban ia nujor bad kiwei pat, ka la kiew ha ki liang baroh.
U Jisu u ong haba phin iohi ia kine, to tip ka LYIUR ka la jan, kaba long ka por ba shyrkhei tam na kiba shyrkhei ka jynjarbah kaba ym pat ju jia mynno mynno bad kan ym jia shuh ruh. Mathaios 24:21, namar ka Israel kan hap ban ieng marwei ha ka sngi khatduh ban ialeh thma ym ka thmabah balai hynrei ka thma hapdeng u briew u sotan bad u Blei namar u soitan un ioh ban ak Blei ialade hapoh ikita ki 3 ½ snem + 30 sngi. Daniel 12:11 / 9:27.
Kumta ia kiei kiei baroh yn pyndep ha Israel ha Jerusalem namar u Blei, ula dep ban kren naduh kaba mynnyngkong, un ym lamler, un pyndep ia kaba u la kren. Jingkhein 23:19/ Isaiah 46:5-7. Ka Israel ka dei ka Dak, bad ka baje, ia ki jingjia ha ka pyrthei. Tang tiak ha Jerusalem ki Riewkhraw, ki la sheptieng namar na Jerusalem yn pynwai ia ka pyrthei.