Haba lap ia ki jingduna, lah ban nang pynbha, ong u Myntri ka koit ka khiah; halor ka Screening Centre ha 13 mer

Nongpoh:Ha ka sngi kaba u Lamphang ka sorkar jylla lem bad u Myntri ka koit ka khiah jong ka sorkar Jylla u Bah A.L Hek, lem bad kiwei ki MLA ki la hiar ban leit jurip ia ka Screening Centre ha 13Mer Byrnihat, u Bah A.L Hek, u la ong ba haba lap ia ki jingduna la lah ban nangpynbha shuh shuh ia ka rukom treikam.

Hadien ka jingjurip ia ka Screening Centre ha 13Mer bad haba jubab ia ka jingkylli ki Nongthoh khubor, u Bah A.L Hek, u la ong ba haba leit ban jurip ia katei ka jaka, la lap ba ki don ki katto katne ki jingduna, hynrei watla katta ruh u la ong ba haba lap ia kiba kum kitei ki jingduna yn lah pat ban nangpynjanai shuh shuh ia ka rukom treikam ha katei ka jaka, kaba dei ruh kawei na ki jaka kaba peit ia ka jingwan rung ki briew kiba nabar.

Utei u Myntri ka sorkar jylla, u la ai ka jingiaroh ia ki bor Distrik ka Ri Bhoi bad ruh ia ki briew kiba trei ha katei ka jaka, namar ka jingtrei shitom ka jong bad kaba la wanrah pat ia ka shong shngain ia ki paidbah ha ka jylla hi baroh kawei.