“Haba lah don ka khyrnit kaba hynriew, balei dang donkam ILP?”

Shillong:Kiba bun ngut ki samla pule na ki jaka pule bapher bapher kiba la ïashimbynta ha ka prokram ïakob ïa tyrko ba la pynlong da ka Rev. J. J. M Nichols Roy Memorial Committee Qualapatty ki la pynpaw ïa la ki jong ki jong ki jingkynthoh bad kumjuh ruh ki jingkyrshan.

Na ka liang ki samla kiba ïakob sha ka liang pyrshah ki la ong kumno ka khyrnit kaba hynriew ka ïada ne dang don jingïadei bad ka jylla namar kam lah ban ïada na ki bar jylla, ka khaïi la kam lut uba nabar, ka laisen khaïi la ïoh bun uba nabar katba ki Khasi pat ki kylla long tang kum kiba shu shongdie kwai, ki jaka khyndew la pynïaid da kiba nabar.
Kine ki la kynthoh ruh ba lada ka khyrnit kaba hynriew ka ai ka jingïada, balei pat ïa ki wah ruh ym lah ban ïada, ka ktien ka thylliej kham pyndonkam bha ïa ka ktien phareng ban ïa ka ktien Khasi.

“Ngi im ha la ka jong ka jylla, hynrei ngim don ka jingsngew shngaiñ. Haba ngi don ki ADC kiba lah ïada ïa ngi, balei hap pan ILP, ban ong pat ba da ka jingïoh ïa ka khyrnit kaba hynriew ka KHADC ka long laitluid kam ïahab satia namar haduh mynta dang shah pynïaid ha ka Sorkar, ngi don ki khlaw kiba lah ban ïoh khajna hynrei balei ki ADC ki da duna pisa ha kaba hap knieh noh ka sorkar ban shim pynïaid ïa ki primary school ha u snem 1996 bad ki ADC kim lah hi ruh wat ban siew tulop nonghikai,” ki la kynthoh.

Ki la kynthoh ruh ba da ka jingai jingbit ki ADC ban pynlong ïakob khwai dohkha bad don bun ki pung dohkha, hynrei dang hap wanrah dohkha, nabar bad kam lah ban pynïaid ïa ka jingïakob khwai dohkha kumta ka KHADC kam lah ban treikam bha namar bym don pisa bad shah pynïaid ha ka sorkar jylla.
“Balei ngi donkam khyrnit kaba hynriew haba ngi la don ka jylla Meghalaya, ki ong ba ka ïada hynrei kam lah ban pynïaid ïa ki kam ai schedule tribe certificate, ki ADC ka long maw jynthut ïa ki projek ka Sorkar na ka daw ki kam khyndew namar ka Sorkar kam lah ban thied khyndew. Ka Hima kadei ban pynkhlaiñ ïa ki aiñ ki kyndon hynrei da phai sha ka Ïewduh bun tang ka jaboh bad ka jingsniew suda. Mynshwa la ju pyndonkam kum ka khyndew raid mynta ka khyndew shimet, ki Riti dustur ki la nangjah, ki wah ki la nang jaboh, ym don aiñ kiba khlaiñ ban ïada na kiba nabar ba lah ban thaw da ki ADC, balei ka mih ka jingïakajia khappud namar ki jaka khlem register bad lada register ha ki Hima ne KHADC bun satang ka jingpan baisha, lada ki ADC ki la mad ka jingkyrduh pisa kumno kin ïada ïa ki riewlum,” kynthoh ki samla pule.

Ki la kynthoh ba lada kren shaphang ka jinglaitluid ki ADC kam ïohi poi kam shano shano ruh namar ba ka sorkar jylla ka pynïaid katba mon I kumba ka Sorkar ka kham khlaiñ bor ban ïa ki ADC, ki khajna ïoh bun ka Sorkar ban ïa ki ADC.
“Balei ngi pan ILP haba ngi lah don ka khyrnit kaba hynriew, ha ka jaka ba kan ïada ka khanglad pynban ïa ka jingwan ki nongjngoh kai pyrthei, bad wat haba don ka khyrnit kaba hynriew dang ïaid bha ka kam tih dewïong beaiñ. Ha u 2019 ka don ka jingïakhun bad ïaknieh hapdeng ka ADC bad sorkar jylla ba kwah pynïaid ïa ki municipal area, nangta ha u snem1976 ki Bhoi ki dawa la ka jong ka ADC, kumta ka khyrnit kaba hynriew ka wanrah jingïapait ïapra, ka wanrah ka jingduk la kadei ki kam khaïi, bad wat haba ha kine ki sngi la ïohi ba ki leit khynra laisen khaïi balei pat ha ki san snem ym leh eiei ne ka jingleit khynra laisen khaïi ïohdei ba lah jan ilekshon,” ki la ong da kaba bynrap ba ka khyrnit kaba hynriew ka wanrah pynban ïa ka bamsap, lada ka khyrnit kaba hynriew ka ïada balei hap ïaknieh jaka bad ki Karbi ne Assam, lada ka ïada ïa ki wah mano ba pynjaboh hato ym dei ba la bun kiba sah nabar kiba pynjaboh namar ki la ïoh rung ïoh sah laitluid.

Ha kaba ïadei pat bad ki samla kiba la kren sha ka liang ka jingai jingkyrshan ïa ka phang kaba ong ‘The Sixth Schedule of the Constitutional is still relevant in Meghalaya at the present context’ ki la pynpaw ba lada ym don ka khyrnit kaba hynriew ki riewlum kin long rit paid.
Haba phai halor ka jingshah knieh ki skul primary ha ka sorkar jylla, ki samla ki la ong ba wat ki nonghikai sorkar ruh kim ïoh tulop, ki ong ki wah ki jaboh hato dei ki ADC ba bret jaboh ne ki katto katne ki paidbah?.
Haba kyrshan ïa ka phang ki samla pule ki la ong ba ka khyrnit kaba hynriew ka ïada ïa rit paid, ka riti dustur, ki ADC ki long ki jaka treikam ba kongsan ki riewlum, ka ai bor ban thaw aiñ ïa ki kam pynneh ki kolshor, bad haba ïadei bad ka jingshimkhia ban pynkhuid wah ki la ong ba ki ADC ki la mang pisa ban pynkhuid ki wah, shna aiñ ban pynshitom ïa kiba bret ñuit pathar bad khlem ka khyrnit kaba hynriew ki riewlum bad rit paid kin sa jahnoh na kane ka thaiñ shatei lammihngi.
“Lyngba ka khyrnit kaba hynriew la ïoh bor lyngba ka aiñ ban ïakhun shaduh Supreme Court lada shah thombor ki riti dustur, ngi ïoh synshar laitluid halor ka khyndew ka shyiap, ka khyrnit kaba hynriew ka long kum ka kmie u kpa kaba ïada, mynta ngi don ka jingitynnad ka mariang ka mei ramew namarba don ka khyrnit kaba hynriew lem kumta lah dap tang da ki Karkhana, ki ïing mala bajrong bad ki dukan heh suda,” ki la ong.