Shillong: U Bah Hamletson Dohling u ba dei u Working President jong ka People’s Democratic Front(PDF) u la pynpaw ba um sngew iahap satia ba ka jingiatylli hapdeng ki seng riewlum hapoh ka jylla kan long tang ha ka por elekshon bad kane ka jingleh ka long tang kum ka jingpynbiej bad ka jingshukor ia u paidbah nongshong shnong ka jylla tang ha ka por thep vote.U Bah Hamletson Dohling u la ong ba ka jingwan jong ka seng thymmai All India Trinamool Congress(AITC)hapoh ka jylla bad ka jingleit rung jong ki 12 ngut ki MLA shapoh katei ka seng kan long pynban kum ka jingiarap ia ki seng riewlum ba kin jop bad khur kham bun ha ka elekshon MLA ka ban sa long ha u snem 2023.
Haba kren sha ki lad pathai khubor, u Bah Hamletson Dohling u la ong,”Ka jingwan jong kane ka AITC shapoh ka state ka jong ngi, nga ngeit skhem ba kan long ka jingiarap shibun eh na ka bynta ki regional party kiba don hapoh ka state ka jong ngi. Ha ka por mynshwa ngin da peit ha ki por elekshon kiba ia pait, kiba iashrut bad kiba ia pait vote ha ka por elekshon kin dei beit tang ki regional party, te hynrei ka jingwan jong ka AITC pat de la iohi kumba kan don ka jingiapait wat ha ki national party ruh”.
U Bah Hamletson Dohling u la ong ruh ba lada ka jingiatylli kan wan khamtam ha ki political party ka dei ban long da ka mynsiem kaba khuid, kaba shai bad da ka jingbym long arsap bad lada iatylli ruh ka dei ban long ha ka por kaba biang hynrei ym ban iatylli pat tang ha ka por elekshon namar kata ka bym iahap satia bad ka long pynban tang kum ban shu pynbiej ia u paidbah ha ka por elekshon bad hadien ka elekshon pat ki la ia pra noh bad lada ki don shisha ban iatylli ki dei ban ia pynbeit da ka lynti kaba khuid kaba shai bad kaba ryntih.
Phi don ban ong eiei?