Haba ki pynmih ktien prah, hato kim dei ki nongkyrshan, ong u bah Prestone

Shillong:U President ka National People’s Party (NPP) ha Meghalaya, u Bah Prestone Tynsong u la ong ba lada ka VPP ka pan sakhi sabut ban pynshisha ba kiba leit pynthut ia ka jingialang ka NPP ha Umsning da kaba pyrta ‘ha u prah… ha u prah…’ ki dei ki dkhot ka VPP, nangne shakhmat ieh kan iaid noh da ka ain.

Ka Voice of the People Party lyngba u kyrwoh na u nongaiktien, u Bah Batskhem Myrboh ka la pynrem bad kyntait ïa ka jingkynnoh u nongïalam ka NPP u Bah Pyniaid Sing Syiem ba ka VPP ka wan ban pynthut ïa ka jingïalang paidbah jong ka NPP. U la ong ba kine baroh ki dei ka jingkren lamler ba khlem ïasnoh bad ka jingshisha ba tang shisapit ruh, bad ka party ka dawa ba dei ban sei ïa ki sakhi ban pynsabut ba kito kiba leit ban pyrta “Ha U Prah” ki dei ki dkhot jong ka party ne ki dei kiba la bthah.

Halor kane, na ka liang u Bah Prestone, u la ong ba lada ka VPP ka buh ia kum kata ka jingdawa, ieh lada ka jia biang kum kata yn phah kem noh ha ki pulit khnang ban iaid ka jingtohkit bad ban lah ban pynshisha phah mano ia kita ki briew. U la ong ba lada ong ban iaid ka sakhi satar ieh kan iaid ka ain.

U la ong shuh shuh ba lada kim pynmih ia ka ktien Prah ka dang biang, hynrei ban pyrta beit ha ‘u prah… ha u prah …’, hato kim dei mo ki nongkyr shan, bad bynrap ba ki paidbah kin bishar bad ki paidbah ki iohi, namar ym tang ia ka NPP hynrei wat u president ka UDP ruh u la shah kren bad shah pynthut hakhmat hakhmat.