Shillong 29 K’Lyngkot: Ka ophis jong ka DC, Shillong mynta ka sngi balang ka 29 tarik Kyllalyngkot 2025, ka la shlei bad dap mam da ki paidbah nongkyrshan jong ubah Jonathan Syiem u kyrtong na ka party Congress na Sohryngkham konstitwensi uban ia aireng ha kane ma ilekshon MDC.
Ha kane ka sngi leit thep kyrteng ubah Jonathan la wan ban synranlang da ki bahaiing hasem ryngkat da ki spah ngut ki nongkyrshan.
Ki nongkyrshan jong u bah Jonathan Syiem hadien ba la poi ha ophis ka DC, Shillong ki la ia pyrta da ka ba ong, “Ha ka Kti, Ha Ka Kti. Naduh ba sdang thep kyrteng ki kyrtong ym pat don ki kyrtong ki ban ialam ia ki nongkyrshan kumba ialam u bah Jonathan namar la sakhi ba mynta ka sngi ki nongkyrshan u bah Jonathan ki la wan poi khrui ha DC, ha kaba ka la pyndap mam ia katei ka ophis.
Ha ka jingiakren bad ki lad pathai khubor hadien ba la dep thep kyrteng u bah Jonathan ula ong, ba kadaw ka ba pynlong ia u ban ia aireng ha kane ka ilekshon MDC kadei namar ba ka jingbun paid ha ka jylla bad ha ka Ri baroh kawei haba khein kyllum 65 % kidei ki ba hapoh ka 35 snem. Kumta u sngewdonkam lang ban ia aireng ha kane ma ilekshon kum u wei u samla rangbah ka thain.
Haba ngi jied ia ki nongmihkhmat ha District Council ngi dei ban da pynshong nongrim bha namar kadei ka iap ka im jong ka jaitbynriew, ban iada ia ka riti ka dustur, ka synshar ka khadar, ka ioh pateng ka hiar pateng, ka khein kur ka khein kha bad ruh ban pynneh ban pynsah ia ka khyrnit ka ba phra, la ong u bah Jonathan.
U la ong ruh, ba ka Congress party kalong trai ka kmie jong ka jylla bad jong ka Ri bad khamtam eh hapoh ka konstitwensi jong ngi, namar naduh mynshwa ha Sohryngkham konstitwensi hi la long trai da ka congress hynrei naduh ba khlad noh u bah David Nongrum uba dei u nongmihkhmat ka party Congress, ka party ka la hiar noh, hynrei ula ong, haba phai pat mynta ki paidbah ki la noh mynsiem shisha ia ka party Congress.
U bah Jonathan u la ong ruh, ba Ka ba ai ia ka khyrnit ka ba phra dei ka party Congress, ka ba pynioh ia ka Jylla ruh dei da ka bor ka Congress bad ka ba la noh synniang shibun ha ka ba iadei bad ka District Council.
“Haba iadei pat bad ka jingpynkupbor ka ki seng samla lyngba ka Elaka Amendment Act bad ka Glan Bill u bah Jonathan ula bynrap, ba lada ngi poi ba kabor ngin sa nangiai buddien bad ka jingthaw ia kane ka aiñ hapoh ka District Council kan nym dei ban ia tyngkhuh bad ka aiñ Kashari”.
Ha ka ba iadei pat bad ka Trading for Non-Tribal, ba la bun ki bar jylla ki ba la kurup ia ki kam kijam hapoh ka jylla, u bah Jonathan u la ong, ba ngin hap ban peit parman bha, ban ioh biang ia ki aiñ ban nangpynkhlain shuh shuh.
Phi don ban ong eiei?