Nongpoh: Haba kren kum u Kongsan ha ka sngi pynkut ia ka Tamasa “Pynneh La Riti” u Bah Prestone Tynsong, Symbud Myntri Rangbah jong ka sorkar Jylla, u la ong ba ka kyntien “Pynneh ia la ki Riti Dustur” ki dei ki kyntien kiba khia bha na ka bynta ka jaid bynriew Khasi Khara.
Haba kren sani halor ki Riti Dustur hapoh ka Ri Khasi bad khamtam ha Ri Bhoi, u Bah Prestone Tynsong, u la ong ba wat ka sorkar ka shimkhia bha na ka bynta ban pynneh pynsah ia ki Riti Dustur, namar dei tang ha ki Riti Dustur kaba lah ban nangkyntiew shuh shuh bad khring ia ki kam jngohkai pyrthei ha ka jylla.
U Bah Prestone Tynsong, u la kren sarong ruh da kaba ong ba kane ka sorkar MDA, ka don ia ka jingthmu ban pynpaw syndon hakhmat ha pyrthei bad kata ka long lyngba ki Riti Dustur ha ryngkat bad ki kam jngohkai pyrthei.
Ha ai ka jingiaroh ia ki nongpyniaid ia katei ka Tamasa bad ia kito kiba la wan ban iashimbynta, u Bah Prestone, u la ong ba ki Riti Dustur ki bun bha ha Bhoi, ha kaba ia kine lah ban pyni bad die sha kiwei pat ki Ri ka pyrthei.
Namarkata, ban nangpynshlur shuh shuh ia ki pyniaid ia katei ka Tamasa, u Bah Prestone, u la ong ba ha u snem ban wan yn sa iatrei ryngkat bad ka sorkar, khnang ba yn lah syndon ban pynlong da kaba kham heh bad ka ban sa khring ym tang ia ki paidbah ha ka jylla, hynrei wat ia ki nongshang pyrthei na kiwei pat ki Ri.
Ha kane ka sngi, u Bah Prestone, u la pynbna paidbah ba ka “Shad Sajer” kan sa dei ka jingshad tynrai ba paw tam ha Ri Bhoi bad ha ka sngi ba pynlong ia katei ka “Shad Sajer” un sa iakren bad ka sorkar na ka bynta ban pynbna syndon da ka shuti ha Ri Bhoi.
Ha kaba pynkut ia katei ka Tamasa ‘Pynneh Lariti’ ba-ar sngi, kaba la pynlong da ka Confederation of Sports, Arts & Culture ka Hima Khat-ar Lygdoh, nalor ka jingdon u Bah Prestone Tynsong, la sakhi ruh da ka jingdon kiwei pat ki MLA ha Ri Bhoi kiba kynthup ia u Bah Sosthenes Sohtun, u Bah Jason Mawlong, u Dasakhiatbha Lamare, ka Kong RM Kurbah, DC ka Ri Bhoi, kiwei kiwei ki riew rangbah lem bad ki nongkitkam ka Hiima Khat-ar Lyngdoh.
Ha kitei ki ar-sngi jong katei ka Tamasa, ki la don bun ki shnong na ki thain bapher bapher jong ka Hima Khat-ar Lyngdoh, kiba la wan ban pyni ia la ka jinglong tynrai, kata ka long naduh ha ka rwai ka siaw, ka shad ka mastieh, ka tem ka put, ka riam ka beit lem bad kiwei kiwei ki jinglong tynrai da ki shnong kiba hap hapoh jong katei ka Hima.