Evangelist N Khongwar
| Synniang ba phi la noh sha ka jaitbynriew, Ki kam ban pynroi, shajrong ban kyntiew. Nongïalam ba don maiñ bad iktiar, Ki talen ba bun ha phi ki shlei miar. Nonghikai ba tbit, riew shemphang ba phylla, Nongïalam ba shisur ha jinglong bashida. Ki sap bun syrtap byllai ha phi ki don, Junom ngin kynmaw ia phi Dr Don. Riew saiñpyrthei ba shemphang phi dei’Politician’ ba tip briew tip Blei, Jingjai jai, sngewrit, jingbat jutang, Bym khwan bor, beh spah jinglong kyrpang. Tnad ba bun kum myntri, phi la bat mynshuwa, Rukom pyniaid kam kiba sngew phylla. ‘Chairman’ planning commission phi la khlieh, Ki ‘plan’ ba kynsai na ki khuiñ ba jylliew phi pynmih. Nongïalam seng saiñpyrthei bad nongpynïatylli; Kawei ka thong, ka jingmut wat la bun ki ‘party’, Phi lah ban tehsong lang kawei. Hato kum phi ngin ioh da kiwei? Kum Myntri Rangbah 108 phi wanrah nyngkong ha jylla, Ban ïoh rah sha jaka sumar: ba mynsaw, pun bad kha. Ki bun ba ngim lah ban ñiewtang ki mat ‘ti Kum ka jaitbynriew Dr Don ngin pyrto ia phi. Nongialam liang pyrshang ba jam tyngam, Phi ther jingleh thurmur; sorkar kam lait saham, Phi ju kren khia ka shon ka jylla, Phi ai jingmut kumno ban kyntiew ïa ka. Shongknor ba shemphang ka dorbar thaw aiñ, Nongpynïaid dorbar ba stad ha ryngkat ka maiñ, Biria dei por ban pyniaid khlem shah liang, Ka sap kum ‘speaker’ ha phi ka da biang. Ki bun riew saiñpyrthei ba la ïaid na kti jongphi, Ki bun ban dang mih ha kiwei pat ki sngi, Kum phi kyrmen ngin sa ïoh Ban ïalam na jinglyngngoh. Ki ktien ryngkat ki kam ki sakhi, Ym tang ha Shella hynrei ha kylleng ka ri, Wat ha pyrthei India kam jong phi ki kren Ym don ba lah ia kane ban len U moiñ manik, lur lam lynti phi dei, La ki sap, ka buit baroh phi la sei. Nongmuna, Akhia kine ba sakhi; Ba phi long ha ki khun Khasi. Haba diengbah u khyllem noh, Kyrmen symbai ba mih kum u kin seisoh, Jingïada ha syrngiew diengbah bun ngi ïoh, Kiba beiñ, ïaroh phi ïada ïa baroh. Kum nongtuh, jingïap syndet ka wan shaw, Jaitbynriew ka sah jinglyngngoh kum ha pdeng ka ri khlaw, Ban tip ba Dr Don ha pyrthei phim don shuh, Ba sha kawei pat ka ri phi la leit shong jynduh. Ka nam jong phi junom kan suhsieng, Ki kam radbah ban tip kiba ngi sngewphieng, Dr Don Dr Don jaitbynriew kan pyrto ïa ki kam jong phi Shijunom kan sah ha dohnud ki khun ka ri. |
Phi don ban ong eiei?