Haba dang duk, hap ban shah ia u slap ne ka lyer, ong u Hilarios Pohktai

Shillong:U samla Hilarios Pohktai u ba la don 26 snem ka rta u ba dei u khun jong ka Kong Harlina Pohktai u bym don shuh pat ia u kpa jong u, u dei uwei na ki samla u ba la kylla long u nongbat boitha ban bylla niah lieng ha ka Wah Umnot naduh ba u dang don 10 snem ka rta ban kit ia ki nongwan jngoh kai pyrthei. U samla Hilarios Pohktai u la iathuh ba u la iehnoh ia ka jingpule jong u tang haduh klas 4 namar bym don shuh u kpa jong u kumta ka la wanrah jingeh ia u ban dang iai bteng ia ka jingpule.

Utei u samla u la iathuh ba ha ki por ba la leit bym pat don tourist u la leit trei da kawei pat ka jait kam bad kata ka long ban leit kit shyiap bad u la iathuh ruh ba da don tourist u lah shu im jakpoh hi katba ai ki briew. Utei u samla u la iathuh ba ha ki por ba don ka jingkhangdam ka la buh jingeh shikatdei bha ia ki nongniah lieng namar bym don tourist bad ia ki lieng la hap ban shu buh kai harud wah bad lada jia ba ka lieng ka don jingsniew ka la shem jingeh bha ban phah shna namar bym don pisa satia.

Utei u samla u la iathuh ruh ba teng teng lada buh ia ki lieng shapoh wah da wan mynstep ki lieng la shah tuh noh ha ki khar bangla bad ka shem jingeh pat ban dang leit biang ia ki sha Bangla namar ba hap ban ai pisa ia ki. Ym tang katta utei u samla u la iathuh ruh ba ha ki por mynmiet ki khar Bangla ki ju wan sha Dawki ban wan tuh maw, tuh lieng bad kiwei kiwei ki tiar bad lada teh da u kynjri ia ki lieng ruh ki khar Bangla ki dang lah hi ban tuh da kaba ki shu pom da pom da ka wait ia kitei ki kynjri bad ki tyllai ba teh ia ki lieng bad rah bak ia ki lieng. U samla Hilarios u la iathuh ba lada bun ki tourist u ju ioh hi ban kamai kumto 1500 ne 2000 ha ka shisngi bad lada ym don tourist pat u la shu leit bylla kit shyiap bad ioh 500 shisngi.

Haba kylli ia utei u samla la u lah ban shah ia ka jingshit kyrang jong ka suiñbneng ha katei ka shnong man la ka sngi ban bylla niah lieng, utei u samla u la jubab ba haba dang duk hap ban shah la ka shah bad ba dang duk lada dei ha u slap ne ha ka lyer ruh hap shah beit bad hapdeng ka jingshit ruh utei u samla u ong ba u trei u ktah beit katba ioh. Utei u samla u la iathuh ba haduh kine ki sngi kata ka jingiarap na kiba khmih ia ka kam jngoh kai pyrthei ruh kam pat ju don satia hynrei u la shu bylla da ka umsyep lajong.