Shillong:Ka Animal Husbandry an Veterinary Department, Directorate of Dairy Development, West Jaiñtia Hills, ka la pynlong ïa ka jingai jinghikai halor ka jing kongsan ka dud kum shi bynta ka jingrakhe ïa ka National Milk Day ka ban long ha ka 26 tarik une bnai.
Ïa ka jingai jing hikai la pynlong ha Ïung walieh ka Chilliangraij ha ka jingwan ïashim bynta ki khynnah skul ryngkat ki nonghikai ka Chilliangraij Govt. LPS, Chilliangraij SSA UPS, Loompyrdi Ïongpiah UPS SSA, Pohmusiang UPS SSA bad ka Panaliar UPS SSA.
Ki riew shemphang kiba la wan ban ai jingbatai shaphang ka jingmyntoi jong ka dud ki long ka Kong Mebel Shylla, Senior Dairy Officer, Animal Husbandry and Veterinary Department, Directorate of Dairy Development, West Jaiñtia Hills bad u Bah E Wann, Dairy Technology, Directorate of Dairy Development, West Jaiñtia Hills.
Ka Kong Mebel Shylla ka la kyntu ïa ki School Managing Committee ba haba ai ja sngi (Midday Meal) ïa ki khynnah dei ban ai lang teng teng bad ka dud khnang ba ki khynnah kin ïoh ïa ki symboh jingbam kiba tei kiba la tip kum ki Nutrient bad Vitamin. Na ka liang jong ka ruh ka la kular ban ai ïa ka dor kum ba ai sha ki distributor sha manla ki skul kiba kloi ban ai dud ïa ki khynnah.
Haba kut ka jingïalang la ïoh ki kyntien khublei na u Oriland Shylla, General Secretary Chnong Chilliangraij, Jowai bad ïa ka jingïalang la pynwai da kaba sam dud ei sha baroh ki khynnah skul bad nonghikai.
Phi don ban ong eiei?