Ha Umwang, pynkup burom ka kynhun ki Karbi ia ki MLA na Ri Bhoi

Nongpoh: Ka kynhun ki Karbi ha Meghalaya bad kaba la tip kum ka ka All Meghalaya Karbi Association (AMKA), ha ka sngi thohdieng, ka la ioh ban pynkup burom ia ki 3 ngut ki Nongmihkhmat na Ri Bhoi, ba ki paidbah ki la jied ia ki ba kin long kum kita ki Nongmihkhmat ha ki Konstitwensi bapher bapher kiba don ha Ri Bhoi.

Lyngba jong katei ka sngi, ha ka jingshisha ki nongialam ka AMKA, ki la khot sngewbha ia baroh 5 ngut ki MLA ha Ri Bhoi, hynrei na kitei ki 5 ngut, kiba la wan ban iashimbynta ki don tang 3 ngut, kata ki kynthup ia u Bah Mayraldborn Syiem, MLA Nongpoh, u Dr. Celestine Lyngdoh, MLA Umsning bad u Bah Charles Marngar, MLA Mawhati, hynrei u MLA Umroi bad Jirang, ki khlem poi sha katei ka sngi ba ki dei ban ioh ia ka jingshah pynkup burom.

Ha katei ka sngi, ba la pynlong ia ka jingpynkup burom ia ki nongmihkhmat na Ri Bhoi, la sakhi da ka jingdon u R.R Ronghang, President AMKA, u Phril Kleiñ Asst. Secretary AMKA, u Bistocan Timung General Secretary AMKA lem bad shibun kiwei pat.

Haba iadei bad katei ka jingpynkup burom da ki nongialam ka AMKA, na ka liang ki nongmihkhmat na Ri Bhoi bad kiba la poi ha katei ka sngi, ki la pynpaw ia ka jingsngew nguh ïaka AMKA, namar ba ki la kynmaw kyrpang ia ki nongmihkhmat bad ha kajuh ruh ka por, ki la phah ruh ia ka khubor ba kin iatreilang bad ki Karbi haba iadei bad ki kam pynroi ha ki shnong ki thaw bad khamtam eh na ka bynta ban wanrah ia ka shongsuk shongsain.