Ha Umsawnongbri pynshai ka ophis u DMC halor ka hok ki khynnah bad ki khun kynthei

Nongpoh: Ka ophis u District Mission Coordinator, SSA Umling Block Resource Centre, Ri Bhoi, myn hynnin ka sngi, ka la pynlong ia ka prokram kaba kyrpang, kaba la tip kum ka Awareness Campaign on Beti Bachao Beti Padhao, ia kaba ki la pynlong hapoh ka skul Raid Nongbri Presbyterian Secondary School kaba don ha Umsawnongbri ha Ri Bhoi.

La sakhi ia katei ka prokram da ka jingdon u Bah Mayraldborn Syiem, MLA ka Nongpoh, U Bah V. S Nongbet, DSEO ha Ri Bhoi, ka Kong A.R Rani, ka Kong S. Lyngdoh, kiba dei ki briew kiba la pynshai halor ka hok ia ki khynnah, ki Rangbah shnong, ki nonghikai, ki khynnah skul na shiphew ki skul kiba don ha katei ka thain lem bad kiwei kiwei.

Lyngba jong katei ka prokram, na ka liang ka Kong A.R Rani lem bad ka Kong S. Lyngdoh, ki la ioh ban pynshai halor ka hok jong ki khynnah bad khamtam haba iadei bad ki khun kynthei, namar kumba ka long mynta ka ba kam thombor ia ki khynnah kynthei, ka la nangkiew katba nangmih ki sngi.
Haba pynshai halor ka jingshah thombor ia ki khynnah kynthei, kitei kiba la ai jingkren, ki la ong ba katkum ka jingwad jingtip, lap ba bun na kitei ki kam thombor pyrshah ia ki khynnah, la leh da kiba haiing ne ki para marjan bad kaba la kot ruh sha ka 90 persen, hynrei tang katto katne la leh da ki briew kiba nabar ne ki bym ithuh ithaw.
Kitei ki nongkren, ki la ai mynsiem ia ki khynnah skul ba lada ki lap lane iakynduh ia kiba kum kitei ki jingjia, kim dei ban buhrieh hynrei, ki dei ban mih shakhmat bad ban ujor sha ki bor ka Ain, khnang ba kito ki nongleh kam sniew kin ioh iala ka jingshah pynsaja.
Nalor ka jinghikai sha ki khynnah, kitei ki nongkren, ki la kyntu ruh ia ki kmie ki kpa bad kiba haiing, ba ki dei ban husiar ia ki khun bad ruh ba ki dei ban hikai ia ki, khnang ba kin lait na ki jingsniew baroh.
Ha katei ka sngi, la ioh ruh ia ka jingkren na u MLA ka Nongpoh, ha kaba u la pynpaw ia ka jingkmen ban iohi ia ka jingshimkhia da ka ophis u DMC, kaba la pynlong ia katei ka prokram, kaba long ruh ka jingmyntoi kaba khraw ia ki khynnah skul bad khamtam eh ba ki la pynlong ha katei ka jaka, kaba la kham long nongkyndong bad kaba dei ruh ka jaka, kaba bun na ki khynnah kim pat da tip bha ia la ka jong ka hok.
Haba iadei bad ki kam thombor pyrshah ia ki kynthei ne ki khyllung khynnah, u Bah Mayraldborn, u la pynpaw lem ia kata ka mynsiem kaba sngewkhia, namar kiba kum kine ki kam thombor ki la nangjyllei bad nangkiew katba nangmih ki sngi, kaba la wanrah ruh ia ka jingshong syier ia ki kynthei bad ki khyllung khynnah.