Ha u snem ban wan, yn pyndep ia ka jingshna ia ka Crowborough Hotel

Shillong: U Chairman ka Meghalaya Tourism Development Corporation (MTDC) u Bah Sanbor Shullai u la ong, ba ka jingshna ia ka Hotel Crowborough, kaba don ha Khyndailad, yn ialeh ban pyndep noh ha u snem ban wan bad ban aiti noh ia kane ka jingtei sha ka sorkar jylla.

“Ha u snem ban wan ha shwa u bnai Nailur, la khmih lynti ba yn pyndep ia ka jingshna Hotel Crowborough bad mar syndep yn sa aiti noh sha ka sorkar jylla” la ong u Bah Sanbor Shullai haba iakren bad ki nongthoh khubor hadien ka jingwan jurip ia ka jingshna ia katei ka Hotel Crowborough kaba la sdang naduh u snem 1986.

U la ong, ba ka MTDC nangne shakhmat, man la u bnai, kin leit ban khmih bniah iaka rukom trei bad ka rukom shna ia katei ka hotel, khnang ba yn pynthikna ba dei ban pyndep ha ka por kaba la buh.

U Bah Sanbor u la ong, tang shu dep shna ia kane ka Hotel kan long ka jingkyrkhu ia ki paidbah namar ki samla kin iohkam iohjam bad kan iarap ruh ban weng ia ka jingeh jong ki nongwan jngohkai kiba iit iaka jaka shong ne sah namar katei ka hotel kan don haduh 101 kamra bad kiwei kiwei ki jingdonkam kum ki ‘5 star hotel’.

Kane ka hotel la mang ba kan don 8 tylli ki 8 economy room, 58 tylli ki standard room, 30 tylli ki deluxe rooms, 5 tylli ki suites, 100 seater coffee shop, 80 seater specialty (Indian / Multi-cuisine) restaurant, 50 seater bar, 35 seater lounge, disco, banquet hall, convention hall, ki guest room, committee room, ki beauty parlor, health club, ki jingialehkai kilan met, steam, sauna, ki jaka ieng kali bad ka jaka die bad thied jingthied kaba 56 dukan.