Shillong:U Director jong ka School Education and Literacy, u Ambrose Ch Marak, u la pynthikna ba ha u snem 2021, yn plie noh ia ka Domiasiat Government L.P School kaba don ha ka shnong Domiasiat, South West Khasi Hills District.
Ia kane u la kular ha ka jingleit iakynduh jong ka KSU South West Khasi Hills ha ka 28tarik u Risaw 2020 ha ophis treikam jong u ha Shillong.
Kum ban shu pynkynmaw ka skul sorkar ha shnong Domiasiat la pynduh noh ha u snem 2007 da ki bor sorkar, hadien ba kane ka shnong ka la pynpaw paitbah ba ka kyntait ia ka jingtyrwa jong ka Uranium Corporation of India Ltd ban ai jingbit na ka bynta ban tih ia u uranium hapoh kane ka dong.
Na ka liang ka sorkar ka la pynkynriah kam noh ruh ia ki nonghikai baroh arngut sha kiwei ki skul.Kane ka jingshah pynduh noh jong kane ka skul ka la buh jingeh ia ki nongshong shnong jong kane ka thain na ba ki la hap ban phah skul noh ia ki khun jongki sha ki jaka ba jngai kumba 10 km na ka shnong jongki.
Ha kane ka jingleit iakynduh, ka seng ka la ban jur ba dei ban maramot noh mardor ia ka ingskul ba la jot rathai ha kane ka shnong mynta bad ban wanrah biang ruh ia ki posts.
Ia ki nonghikai ba la phah kynriah kam shawei na ka liang jong u Director u la kular ban pynthikna ban shim khia halor kane ka mat khnang ba ka skul kan ioh ban plie noh ha snem ba thymmai.
Ia ka kynhun jong ka seng ha kane ka jingiakynduh la ialam da u samla Forwardman Nongrem President KSU South West Khasi Hills District nad kiwei ki dkhot, ha ka jingiasynranlang jong u samla Raymond Kharjana Education Secretary KSU bad u samla Iashan Mukhim Asst. Organising Secretary KSU na ka Sengkmie.
Phi don ban ong eiei?