Ha u ‘Sing’ shongshit ka elekshon Malaisohmat: MDC Langrin

Shillong,23 Jylliew:
Haba pynpaw ba ka jingjied Syiem ha Malaisoh mat, ba ka long pyrshah ia ka riti ka dustur, kaba ki longshuwa ki man shuwa ki ju leh, ka liang pyrshah kam shym la mynjur ia ka kaiphod, ba la wanrah da u EM i/c Elaka bad ka rukom jied syiem ba ka KHADC ha Malaisohmat kaba la pyn iaid lyngba ka EC ba la ialam da u bah Ardent Basaiawmoit, hynrei ka shongknor Ing dorbar, ka la hap ban shu shim rai da ka jingpeit ia ka jingbun paid, ha kaba na ka liang ka bor synshar kaba don ha ka kynhun ARPA ka la pyni ba ka don ha ka jingbun paid bad katei ka kam kan iaid beit. Haba iatai bad pyni ia ki nia ki jutang, halor ka jingjied Syiem ha Malaisohmat, u CEM barim ka KHADC uba dei ruh u MDC ka Langrin u bah Mansturdy Nongrem, u la ong ba ka jingjied Syiem ha Malaisohmat ka long kaba sngew thamula, namar ba ha ka sngi thep vote ka la don ka jing iapyrta kaba jur , kaba ong ‘Ha u Sing-Ha u Sing’. U MDC ka Mawkyrwat uba don ha ka liang pyrshah, u la ong ba katei ka jingia pyrta Sing, ka la pyni ba ka don ka sain pyrthei .
U bah Nongrem u la kynnoh ba katei ka jingshim rai ka KHADC ban pynlong elekshon jied Syiem ha Malaisohmat , ka pynpaw ba ka EC ka la leh donbor, bad bad ka la iuh roit ia ka hok ki para MDC naba ym shym la ailad ia ki ban ia kren, “Wat ia ki seng lehnoh hap ban ia kren, hynrei ia ki para member la iuh roit” ong u MDC ka Mawkyrwat.
Katkum ka jingiathuh ki MDC ka KHADC, ha ka jingiakynduh bad katto katne ngut ki nongthohkhubor, hadien ba la wai ka Dorbar, ki la iathuh ba ha ka 13 tarik u jylliew, ka sngi ba la pynlong ia ka jingjied Syiem ha Malaisohmat, ka la don ka jingiapyrta kaba jur kaba ki paidbah ki ia pyrta ‘Ha u Sing- Ha u Sing’, bad katei ka dei ka daw ba ki la kynnoh kaba ki ong ba lehse ka lah ban don ka politik, ha katei ka jingjied Syiem ruh.
Haba pynshai halor katei ka phang, na ka liang u bah Ardent Basaiawmoit, u la pynshai ba ka jingleh ka EC kam dei ba ka don kano kano ka politik lane ban pynksan bad rah skong ia ka HSPDP, namar ba ha ka EC la donlang ruh ka UDP bad kumjuh ka KHNAM, kaba ki hap ban leh da ka jingiasngewthuh lang.