Shillong, 9 Nailar:
Ka jylla Meghalaya lem bad ki sorkar jong ki jylla kane ka thain North East kin sa pynlong ia ka jingiakhun jumai ha u bnai Rymphang, la shem snem. Kane ka jingiakhun kan long kumno ban lait im bad ban iada lada wan u jumai.
Lem bad ki jyllakane ka thain, ka Meghalaya ka la shah bthah ha ka National Disaster Management Authority (NDMA) ban pynlong ia ka jingpyn khreh lada wan u jumai bad ia kane ka prokram la buh ba kan long ha u Rymphang, 2014. Ka daw ka long ba ka jylla Megha laya ka hap ha ka lynti iaid jong u jumai ne kum kata ka Seismic Zone 5.
Yn pynlong ia kane ka jingpynkhreh ryngkat ka jingiatreilang bad ka sorkar pdeng, ka North Eastern Council.
U DG ba peit ia ka Civil Defence bad Homeguard u Kulbir Krishan u la ong ba “ka jingpynlong ia kane ka jingpynshai paidbah ka la sdang.
U Krishan u la iathuh ruh ba kane ka jingpynlong kan ym long tang da ki tnad sorkar jylla hynrei ki tnad sorkar pdeng ruh, ki shipai bad ki pulit kin don bynta lang.
Haba batai kham bniah, u DG u la ong ba ka jingbuh ia ka prokram kaba shai kan long hadien ka jingialang ban long ha ka 22 tarik Nailar ha Guwahati.
“‘Ha kane ka jingialang, yn iakren kumno ban leh ha kaba iadei ban pynlait im, ban iada, ban iarap dawai, bad kiwei kiwei ki kam” la ong u DG.
Kane ka jingpynkhreh kan kynthup baroh naduh u Chief secretary , deputy commissioner , ki pulit bad ki paidbah.
U DG u la ong ba ka pisa na ka bynta kane kam, la mang T. 17 klur da ka sorkar pdeng bad yn pynlait sha ka State Disaster Relief Fund.
Shuh shuh u Krishan u la iathuh ba ka sorkar jylla ka la dep mynjur da ka National Disaster Response Force (NDRF) ban pynbiang 310 tylli ki tiar ba donkam ban iakhun lada wan u jumai.
Ia mynta, ka jylla ka don tang 150 tylli ki tiar bad kiba sah yn ioh nabar jylla. “Ka pisa ban ioh ia kine ki tiar la mang na ka 13th Finance Commission,” u la ong.
Katto katne ki tiar ki long kum ban phah khubor, bad kiwei.
U DG u la ong ruh ba la ban ruh ban ai jinghikai bad na bynta kane la mang T.1 klur man u snem.
Phi don ban ong eiei?