Shillong: U Chairman ka Meghalaya State Planning Board u bah Lambor Malngiang u la pyntip ba ha u bnai Naiwieng, un leit jurip ia ki jaka ki ba la ioh skim lyngba ka Aqua Mission ban shna pung ban ri dohkha.
Ha ba ia kren bad ki nong pathai khubor u bah Malngiang, u la ong “Ngan leit jurip hi da lade ha u bnai Naiwieng khamtam ia ki to ki jaka ki ba la bei haduh 25 haduh 30 lakh ban leit peit hi katno na kito ki jaka ki la lah ban pynmih ia ki dohkha. Kumba long mynta kumba 27 hajar ki pung kiba ka sorkar ka la thmu ban ai jing iarap ban shna ia ki pung bad ban ri ia ki doh kha ha kaba kumba 19 hajar ki ladep shna ia ki pung dohkha.”
Ha lor ka jing pynkylla ia ki jaka rep sha ki jaka ban shna ia ki pung dohkha u bah Malngiang u la ong ba ka jing shna ia kine ki pung dohkha ha ki jaka ki ba mih bha ki mar rep ka ktah ia ki jaka rep, khamtam ha ki thain jong ka Ribhoi District. “Na ka liang jong ngi ngin hap ban shim khia ha lor kane ka liang khang ba kan ym ktah ia ki jaka ki ba pynmih bun ia ki mar rep ngi hap ban pynkylla ia ki ain (rule) ban iada ia kine ki jaka” ong U bah Malngiang.
Halor ka jing kylli ba hato don ne em ka jing pyndonkam bakla ia ka pisa ha ka ba ki la dep ioh ia ki pisa, hynrei kim shym la shna ia ki pung ne khlem da ri ia ki dohkha u la ong “Ka dei ka kamram jong nga ba ngan leit jurip hi khnang ba ngan tip ia ka jing pyndonkam bakla ne pyndonkam bha ia kane ka skim Aqua Mission kat mynta ki don ha duh 8 hajar ki pung kiba dang shna ngin leit ban jurip ia ki ne ki pung ban shim khia halor ka jing don ki dohkha lane ki don ki pung ha kito ki district ki ba la don haduh 500 ne 1000 ngut ki ba la ioh jing iarap na ka ne ka Aqua Skim” ula pynkut.
Phi don ban ong eiei?