Ha U Naiwieng, khot ka KHADC ia ki khlieh nongsynshar

Shillong, 2 Nailur:
Mynta ka sngi ka la don ka jingialang jong ka Council of Traditional Dorbar kaba la wan ban ia shim bynta da ki khlieh nongsynshar ha ryngkat ki MDC ka KHADC. Ha katei ka dorbar la shim ia ka rai ban khot ia ka dorbar pyllun jong ki Khlieh nongsynshar baroh ha u naiwieng mynta u snem ha kaba yn sa pynbna, kham hadien ia ka tarik.
La shim ruh ia ka rai ba ki dkhot jong katei ka Council kin leit ban ia kynduh ia u Lat ka jylla ban kyntu ba un pynlong aiñ noh ia ka bill jong ki khlieh nongsynshar ba la pass ha ing dorbar ka KHADC kata ka Khasi Hills Autonomous District ( Constitution of Council of Traditional Dorbar ) Bill, 2019.
La shim ruh ia ka rai ban leit ia kynduh ia u myntri sorkar jylla uba peit ia ka District council ( District Council Affairs) ban ia kren ia katei ka juh ka mat.
La rai ruh ban leit ia kynduh ia u myntri ka tnad pynroi sor (Urban Affairs) ban ia kren halor ka jingkyntur pud ka MUDA sha ki jaka kiba hap hapoh ka jingpeit ka District Council. Ha katei ka jingialang la rai ba mynta shipor ia ka ophis jong ka Council of Traditional Dorbar yn buh ha District Council. Ha katei ka jingialang ki la don bun ngut ki khlieh nongsynshar ba kynthup naduh ki Syiem, ki Sordar, ki myntri, ki Rangbah Shnong.