Shillong: U Chairman ka Meghalaya Tourism Development Corporation (MTDC) u bah Sanbor Shullai mynta ka sngi, u la ong ba ia ka hotel Crowborough ha Khyndai Lad, yn plié noh ha u Nailur 2020 bad kan ai kam ym duna ia ka 500 ngut ki samla ba la nang ba la stad.
Mynhynnin ka sngi, u bah Sanbor lem bad u Managing Director ka MTDC bah Cyril V Diengdoh kila aiti ia ka kaiphod ka MTDC sha u myntri rangbah ka jylla u Conrad K Sangma, ha kaba la kam ba ka la ioh nong palat T. 6 klur.
U bah Sanbor u la ong ba ka jingioh nong ka MTDC ka dei kaba kham heh duh haba ianujor bad kiwei ki snem ba la dep namar ba ka ju kyrduh pisa bha.
“Ngi la aiti ia ka kaiphod ha u myntri rangbah ha kaba ka jingioh nong ka long T. 6 klur tam. Ha ka por mynshwa, la ju iarap ka sorkar sha ka Corporation kumba T. 50 lak shi snem hynrei ha kine ki ar snem, ka sorkar kam shym la ai shuh kane ka jingiarap namar ba ka Corporation ka la lah ban pyniaid bha”, la ong u bah Sanbor.
Ia kane ka Crowborough hotel dang shna da ka Auro Hotels bad Resorts Pvt Ltd ba la iasoi da u nongshim wai. Hadien ba la pyntreikam, ka MTDC kan ioh T. 1.73 lak shi snem.
Ia mynta ka MTDC ka pyniaid saw tylli ki hotel ba kynthup ia ka Pinewood, State Convention Centre, Orchid Hotel bad ka orchid Lake Resort bad kiwei kiba kham rit kum ka Jiva Nongpoh, Orchid Inn Thadlaskein, Tourist Lodge Dawki bad kiwei.
U Managing Director ka MTDC u bah Ceyril V Diengdoh u la ong ba ka MTDC ka la buh thong ban pynmih pisa T.100 klur ha kine ki 20 snem ban wan.
Kiwei pat ki lad khubor, ki iathuh ba mynta ka sngi u MLA ka North Shillong bad u ba bat ruh kum u Chairman jong ka Meghalaya Tourism Development Corporation Ltd, U Sanbor Shullai u lah leit ban ai ia ka ‘performance report’ ha u myntri ka Jylla U Conrad K Sangma. Ha ka jing leit jong u lah synran lang da u Managing Director (MD) ka MTDC u bah Ciril V Lyngdoh lem bad kiwei ki ophisar jong ka MTDC.
Ha ba kren bad ki lad pathai khubor U Sanbor Shullai u lah ong ba ha ki ar snem ka MTDC ka lah ioh ban lum khajna kumba 6 klur na bun ki Unit ba ka ai wai sha ki riew shimet.
U Sanbor Shullai u lah pynshai ruh ba ka ‘Crowborough Hotel’ ka lah jan dep artad bad ia ka yn plie noh ia ka ha u Nailur 2020. U lah pynpaw ruh ba lada plie noh ia ka ‘hotel crowborough’ kumba 500 ngut ki khynnah samla na ka jylla kin ioh kam.
“Lyngba ka jing dep noh ka “Crowborough Hotel” ka MTDC kan ioh lad ban thaw biang sah 4 tylli ki unit ha ka ba ka MTDC kan ai wai sha ki riew shimet khnang ba ka ioh ban kyntiew ia ka ioh kam ki khun samla ka jylla” lah bynrap U Sanbor Shullai
U Managing Director (MD) ka MTDC u Ciril V Lyngdoh u lah iathuh ba ka MTDC kan pynkhreh da ka ‘Vision documents’ na bynta 20 snem khnang ba ka MTDC bad ka jylla hi baroh kawei kan ioh lum khajna kham bun ha ki snem ban wan.
Phi don ban ong eiei?