Ha u Nailar, yn jurip ki Regional Committee ia ki 3 tylli ki jaka

Nongpoh:Hynnin ka sngi Saitjain, ka la don ka jingiakynduh hapdeng ki ka Regional Com mittee na Meghalaya bad Assam, ia kaba ki la iakynduh ha Assam State Guest House, Koina dhara, Khanapara.

Ha katei ka jingiakynduh hapdeng ki heh na Meghalaya bad Assam, ia ka komiti na Meghalaya la ialam da u Bah Prestone Tynsong, Chairman ka Regional Committee, ha ryngkata ka jingdon u Bah Sosthenes Sohtun, MLA Jirang, u Bah Charles Marngar, MLA Mawhati, u Bah Damanbait Lamare, MLA Umroi, u Bah Pyniaid Sing Syiem, CEM ka KHADC lem bad kiwei.

U Bah Prestone Tynsong, haba kren sha ki lad pathaikhubor, u la ong ba lyngba katei ka jingiakynduh hapdeng ka Komiti na Meghalaya bad Assam, ki la rai ba kin sa sdang noh ia ka jinghiar jurip ia ki Shnong ba don hapdeng ka jingiakajia pud, naduh ka 26 tarik Nailar ban lum ia ki jingtip halor ki jinglong jingman jong kine ki Shnong, shuwa ba kan don ka jingiakren pynbeit pud hapdeng ki Myntri Rangbah ka Meghaaya bad Assam.

U la ong ruh ba ha kane ka kynti jong ka jingpynbeit pud, ki arliang mamla ki komiti, ki la iatai bad iakren shwa tang ia ki lai tylli ki sector-ka Desh Doomreah, ka Nongwah Mawtamur bad ka Borduar.