Ha u myntri pohiing, rah u James, ba pynjlan GHADC

Shillong, 03 Iaiong:
U MLA ka NNP u James K Sangma u la rah sha u myntri khynnah ka tnad kam pohiing ka ri u Kiren Rijiju halor ka jingpynjlan khlem nong rim ka sorkar Congress ha Meghalaya ia ka por jong ka Garo Hills Autonomous District Council (GHADC) bad dawa ba ka sorkar pdeng ka dei ban tuklar ban pynlong noh ia ka elekshon. U James u la pynsngew ruh ia ka jingshah lehbeiñ jong ki dkhot ka ANVC bad ka ANVC(B) kaba la pynduh pyndam.
U MLA NPP u la iakynduh ia u Rijiju ha New Delhi ha kane ka sngi Palei ban iathuh ia ka jinglong jingman ha Garo Hills halor kine ki mat. Ha kane ka jingiakynduh u James u la kyntu ia u myntri khynnah ka sorkar pdeng ba un tuklar halor kane ka jingleh bym shongnia jong ka sorkar Congress ha kane ka jylla.
U la iathuh ba ia ka Garo Hills Autono mous District Council (GHADC) la pynjlan la lai sien tang namar ba ka sorkar jylla kaba synshar ka Congress ka la kwah ban don ha ka bor synshar da kaba pynjlan jubor ia ka por ka GHADC.
“Ka long kaba sngewsih ba ka GHADC kaba la jied na ka bynta san snem, la shu pynjlan khlem nongrim pyrshah ia ka riti synshar ka ri”, la ong u James K Sangma ha u  Rijiju.
Ha kajuh ka por, u James K Sangma u la iathuh ha u Rijiju shaphang ka jingsah umdum ki dkhot ka seng ba la pyndam ka ANVC bad ka ANVC (B) namar ba ka sorkar u Mukul Sangma ka la shu kular kai khlem lah ban pynurlong.
U la kyntu ia ka sorkar pdeng ba kan shim khia ia kane khnang ba ki dkhot kin lait na ka jingeh kumba la iateh bad ka sorkar.