Shillong: Myn hynnin ka sngi u Chairman ka MTDC u bah Sanbor Shullai bad u chairman jong ka MIDC u bah Renikton Lyngdoh Tongkhar ha ryngkat ki ophisar na kitei ki tnad ki la leit ban jurip ia ka jingiaid ka kam kaba pyntrei ia ka Crowbo rough hotel kaba don ha Khyndailad. Ha katei ka jingleit jurip ki ba peit ia katei ka kam ki la pyntip sha kitei ki nongmihkhmat paidbah ba ha u Kylla lyngkot 2020 yn ioh ban plie ia katei ka Hotel.
La khmih lynti ba katei ka Hotel kaba yn pyniaid lang da ka Novotel ka kompani kaba ia trei bad ka Accor Hotel Group kaba na France kan dei kaba lah ban khring bha ia ki briew. U bah Sanbor u la ong ba katei ka hotel kan lah ban ai kam ai jam ia kumba 150 ngut ki briew bad u la kren shai sha ki nong pyniaid ba ki dei ban ai kam ia ki samla trai jylla naba ki don bun ki samla kiba khlem kam khlem jam bad kiba la dep ban pyntbit ha ki kam kiba ia dei bad ki Hotel bad u la ong ruh ba dei ban ai kam ia ki kontraktor trai jylla khnang ba kin ioh kam ba kin lah ban ieng ha la ki kjat.
Lah ban kdew ba katei ka Hotel ka dei kaba la sdangban pyntrei la 30 snem mynshuwa naduh u snem 1987 bad ka dei ruh ka hotel kaba la wanrah jingduhnong da ki klur tyngka ia ka sorkar jylla. Ha u snem 1987 ka sorkar ka la aiti ha ka M/S S A Builders ban trei ia katei ka kam ha ka jinglut kaba la mang T.2.6 klur tyngka bad la ai por ba kan pyndep hapoh 20 bnai hynrei katei ka kompeni kam lah ban pyndep kumta ha u snem 1989 ka sorkar ka la sloit noh ia ka kam na katei ka kompeni.
Ha u snem 1993 ka sorkar ka la aiti sa ha ka M/S Astra Construction Limited ban trei ia katei ka kam ha ka jinglut kaba la mang T.2.65 klur tyngka bad la ai por 15 bnai ban pyndep hynrei ha u snem 1996 la sloit ia ka kam na katei ka kompeni ruh namarba kam lah ban pyndep. Ha katei ka por ka sorkar ka la dep siew ia ka T.2.6 klur sha ka M/S S A builders bad T.2.65 klur sha ka M/S Astra Construction Limited hynrei hadien ba ki la shah sloit ia ka kam ki la ujor mukotduma sha kashari bad ka sorkar ka la pynkut noh ia ka mukotduma bad kitei ki kompeni da kaba siew bai lutksan T.1.94 klur sha ka M/S S A builders bad T.1.3 klur sha ka M/S Astra Construction Limited. Kumba ka long mynta ia ka kam ban pyndep ia katei ka Hotel ka sorkar ka la ia soi bad u Leslee Shylla.