“Ha u 23, ka Rambrai Jyrngam, kan long noh ka jong ka NPP”

Shillong:U MDC ka Rambrai -Jyrngam, u bah Bajop Pyngrope, mynhynnin ka sngi u la ia roh ia ka seng sain pyr thei National People Party (NPP) da ka ba ong ba dei tang ka ne ka seng kaba ym pat ju ioh sngew ba kan don kano kano ka jingiashrut hapdeng ki nongialam jong ka.

Mynhynnin ka sngi na ka liang ki nong ialam jong ka party NPP ki la pdiang sngewbha ia u MDC ka Rambrai-Jyrngam, u bah Bajop Pyngrope, ban long kum u dkhot jong ka party ha ka jingialang kaba la long ha ophis trei kam jong ka seng.

U Bajop Pyngrope u la ong ba ka daw ba na ka liang jong u, u la shim ia ka rai ban pyniasoh ia lade sha ka party NPP ka long namar ba dei tang kane ka party kaba ym pat ju don kano kano ka jingiashrut hapdeng ki nongialam jong ka naduh ka sngi ba la thaw ia ka.

“Ka party NPP ka dei ka party kaba khlain tam ha West Khasi Hills District bad ka dei ruh ka party kaba naduh ba la thaw ia ka haduh mynta hi ngim pat ju iohi ba kane ka party ka don kano kano ka jingiashrut bad dei na kane ka daw ka ba nga la shim ia ka rai ban pyniasoh sha ka party NPP”la ong u bah Bajop.

U bah Pyngrope u la ong ba ka Rambrai Jyrngam Constituency kaba ju dei ka Constituency jong ka party Congress, hynrei da ka jingwan pyniasoh jong u bad kum juh ki nongkyrshan jong u khlem pep ha u snem 2023, kane ka constituency kan kylla long ka Constituency jong ka party NPP.