Shillong:U nongialam bad u myntri sorkar jylla na ka BJP u bah Alexander Laloo Hek u la ong ba ka jingmih resot MLA ha ki saw tylli ki elekshon mynta ka sngi, ka la pyni shai kdar ba ym donkam shuh ban iakren mano ban ialam ia ka sorkar ha ka ri ha u 2024, hynrei ka BJP kan sa sar naphang lin ha ka ri.
Haba kren mynta ka sngi, u bah Hek u la ong, “Ha u 2024 lei lei te, ynnai ia ong shuh, namar hangtei lei, kaba synshar kaba long dei ka elekshon ha ka ri baroh kawei, ym dei shuh ka elekshon ha ki jylla, ka BJP ka dang sat beit”, la ong u bah Hek.
Haba pynpaw ia ka jingkmen halor kane ka jingjop ka BJP, u bah Hek u la ong watla kam pat lah ban jop ia ka jingbun ngut ha Telangana hynrei mynshwa ka BJP ka jop tang uwei katba mynta ka kiew sha ka 10 ngut.
“Ngi ai khublei ia ki BJP, Rajasthan, Madhya Pradesh, Chhattisgarh. Ngi la khmih lynti ban jop namar ka jingwanrah u Modi ia ki prokam kiba ai jingmyntoi ia ki paidbah kum ka skhim iing baduk, khaw baduk, ka lyer shet bad kine kila rung beit sha man ki thliew iing baduk ha ka ri”, la ong u bah Hek.
Ha ki saw tylli ki jylla kiba la pynbna ia ka elekshon mynta ka sngi, ka BJP ka la jop lai tylli ba kynthup ia ka Madhy Pradesh, Rajasthan, bad Chhattisgarh katba ka Congress ka jop ha Telangana.
Ka jingniew vote sa ia ka jylla Mizoram kan long lashai ka sngi.
Phi don ban ong eiei?