“Ha u 2017 yn ioh painkhana lut ki nongkyndong”

Shillong, 21 Iaiong:
Ka sorkar jylla ka la buh thong ban pynioh painkhana ia baroh ki thliew iing ha ka jylla ha duh u snem 2017.
“Ka sorkar ka la kut jingmut ban pyndep ia kane ka thong ha u snem 2017,” la ong u Principal Secretary ba peit ia ka PHE u PW Ingty haba plie ia ka workshop ba ar sngi halor ka phang ‘Nirmal Meghalaya’ ha kane ka sngi Nyngkong.
Ka jingpyntreikam ia kane, ka la iaid shaphrang ha kaba ki paidbah kim dei shuh ban leit oh haduh ha kiar katba shaba bashem.
“Kane ka thong na ka bynta ki shnong ha ka jylla”, la ong u Principal Secretary ka PHE.
U la ong ba ha kine ki lai snem ba la dep, ka kam ka la iaid bha shaphrang ban pyntreikam ia kane ka kam.
“La bun bah ki shnong nongkyndong kiba pyndep ia kane ka projek ha kaba man ki thliew iing ki la shna ia ka painkhana”, la ong u Ingty.
U la ong ba 11 tylli ki shnong ki la ioh pdiang ia ka khusnam Nirmal Gram Puraskar (NGP) ha u snem 2008, bad 365 tylli ki shnong ki la ioh ia ka khusnam NGP ha u snem 2010-2011.
“Haduh mynta ka jylla, ka la ioh khusnam 588 tylli ha ka NGP haduh u 2012,” la ong u Ingty.
Palat 1300 tylli ki shnong ki la thep ban ioh ia ka skhim painkhana ne ka NGP ha u 2010-2011, la iathuh u principal secretary bad 1300 tylli ki la thikna ba kin ioh ha u 2013-2014.