Ha u 2008, 2013, ym ju mih surok U bah Ardent, ong u heh NPYF

Shillong:U President ka National People Youth Front NPYF kaba dei ka tnad samla ka NPP, u bah Kitbotlang Nongrem u la kynthah ia ka jingmih surok ka Voice of the People VPP hapoh ka jingialam u bah Ardent M Basaiawmoit, ba ka dei tang ka buit ban pynjaboh ia ka jingmut jingpyrkhat jong ki samla na bynta ka jingmyntoi sain pyrthei.

Haba kren ha ka jingialang iasyllok ka NPP Umsning Block mynta ka sngi ha Lad Sharai, u bah Kitboklang u la ong ha u snem 2008, 2013 u bah Ardent u MLA um ju mih sha surok ban dawa ia kata ka Reservation Policy bad kiwei ki mat, hynrei ha kane ka kynti hadien ba ula seng ia ka seng lajong ka VPP, u mih sha surok ban iakhih ban pynjngut bad pynrung ia ka jingmut kaba bakla ha ki samla bad ki nongshong shnong na bynta ka jingmyntoi ka party.

U bah Kitbok u la ong ba ka jingpynkhih ia ka Reservation Policy ban ioh ban pynrung ia ka jingsngew mynsiem ha ki samla hynrei kim tip ba ka kam sorkar kam lah ban pynbiang kam ia baroh namar ba ha ka shi snem ka jinglait kam ka long tang 2000 tylli eiei katba ki samla kiba la nang la stad ki don kumba 60 hajar ngut eiei.
Ula ther ruh ia ka Clean Politic ba ki shu leh mynleh tang ha ka por elekshon ban sei pisa ialade ban jop elekshon bad ynda la jop kim kwah ban iarap ia ki paidbah da kaba ong ba kim don bai skul, ban iarap ia kiba shitom hynrei kum u para briew haba donkam shisha kiba duk ka dei ka kamram ban iarap namar ba haba shakri ia u para briew ka long kajuh kumba shakri ia u blei.

U la ong ba ki paidbah kim dei ban shah ialam bakla kumba shah bakla ma u, ha u snem 2002 ha ka por ba mih ka seng KHNAM ha kaba ula ngat, hynrei u sngewthuh hadien.
“Wat shah ialam bakla kumba shah ialam bakla ma nga ha u snem 2002 ha ka por ba mih ka KHNAM, ki pynkhih ia ka dohnud jong nga ban pynim ia ka ri bad ka jaitbynriew, ki pynkhih ia ka dohnud jong nga, tem ia ka jingrwai KHNAM u dohnud bah Kit u khih ding ding namar ba kwah ban pynim ia ka jaitbynriew, namar ba ki ong ka ri ha tmier ka riat nga kwah lem ban iarap ia ka ri ba kan yn hap shariat hynrei hadien bun snem nga lap ba nga shah ialam bakla, shah pynjaboh ia ka jingmut jingpyrkhat jong nga”, la ong u bah Kitboklang.