Shillong:Ka kynhun ki myntri ka sorkar Jylla, ba kynthup ia u bah Hamletson Dohling, myntri pynroi sor, Bah Samlin Malngiang, myntri ka tnat PHE bad ka Agatha K Sangma shabuk sorkar, ki la leit jngoh ia ka nongbah Alappuzha, ha Kerala na ka bynta ban peit ia ka rukom bret bad pynkhuid ia ka jaboh jabain ha katei ka nongbah.
U Bah Hamlet Dohling, ka Agatha Sangma bad U Bah Samlin Malngiang, ha ryngkat bad ki bor pyniaid ka Alappuzha Municipal Board, ha ka Sngi U Blei:CMO
Ha ka jingleit ki myntri, ki la iakren bad ki briew sorkar jong ka tnat Municipal na Alappuzha bad ki la leit jngoh ruh ia ki katto katne ki jaka ban peit dalade hi, ia ka rukom trei kam ka rukom bret jaboh.
Ka Alappuzha model, ka don ia ka jingbret niut, kaba la ithuh da ka United Nations Environment Programme (UNEP) bad kaba long kawei na kiba biang tam ha ka pyrthei hi baroh kawei.
Ka rukom bret niut jong ka Alappuzha Municipal Board, ka long ba ka don 5000 tylli ki jaka shet ia ki niut bad nangta 3000 tylli kiba pynmih ia ka biogas, 2800 tylli ki nar kiba pyntuid jaboh bad haduh mynta ka la lah ban lum ban lang ia 80 percent na ka jaboh kaba don 1.74 lak ngut ki nongshong shnong.
“Ka Alappuzha ka don ia ka plan ba kawei pa kawei ka long iing kan lah ban thang ia ki niut ha kyrpong iing lajong” ong ka Agatha Sangma, haba peit ia ka rukom treikam katei ka jingbret niut.
U Bah Hamletson Dohling, u ong kum ka jingsdang ia katei ka prokram, yn sa pyntreikam noh shen ha Shillong bad ha Tura shwa.
La ong shuh shuh, U bah Dohling “Ha u snem 2022, ka Meghalaya, kan pdiang sngewbha ia ka jingialehkai National Games bad kan dei ka jingkut jingmut jongngi ban pynkhuid bha ia ki niut ki nier bad ngin buh da ka por, ba ngin lah ban poi sha ka thong”.