Shillong, 13 Nailur:
U Dr RC Laloo mynta ka sngi, u la pynrung kyrteng ia ki khynnah ba kin leit skul noh naduh mynta u snem. Ia kane u la leh ha ka jingialang rakhe ia ka sngi ka thoh ka tar ha ka pyrthei kaba long hynne ka sngi ha u Soso Tham Auditorium.
Baroh 16 ngut ki khynnah mar ar ngut na kawei kawei ka district jong phra tylli ki Community and Rural Developmemt Block, kiba wanrah ia ki khynnah sha kane ka sngi.
La pynrung kyrteng ia ki ban leit skul ha ka SSA kynthup ha Mylliem Block, Mawsynram, Mawryngkneng, Mawkynrew, Pynursla, Mawphlang, Laitkroh-Khatarashnong, bad ka Shella-Bholaganj Block.
Ha kajuh ka por, u Symbud Myntri Rangbah ba peit ia ka pule puthi, u la pynlait ruh ia ka geographic information system (GIS) ka ban batai ia ka jinglong jong ki skul ha kane ka jylla. Ki briew ki lah ban ioh jingtip lut nadong shadong ia ka jinglong ki skul, ka iing ki tiar ki tar, ki nonghikai, ka kyrdan jongki, bad kiwei kiwei tang da kaba khnoit da u khnai ka computer.
Haba kren ha kane ka sngi, u Dr Laloo u la ong ba ka thong jong ka sorkar ka long ban pynnang pynstad ia baroh ha kane ka ri. U la ong ba haduh mynta ka jylla Meghalaya ki nongshong shnong kiba la nang 75.48 percent. “Kam dei kaba eh ban jop 100 percent, hynrei kan shim por lehse katto katne ban poi sha kane ka thong”, la ong u Dr Laloo bad bynrap ba ha kawei ka sngi, kane ka jingkhein ka dei ban kiew na kaba don mynta.
U la ong ba la don ki shnong nongkyndong kiba la lah ban jop ia kane ka thong bad namarkata, kam don jingeh ia ka sorkar ba kan lah ban jop ia kane. “Sngewbha iarap ia kito ki bym nang ban thoh ban tar”, la ong u Dr Laloo bad bynrap da kaba khot lang ia ki nonghikai, ki kmie ki kpa bad ki paidbah ban iatreilang ban pynurlong ia ki jingangnud jong ki paidbah ha ka liang ka pule puthi.
Shwa ia kane la ioh ka jingkren na u symbud kongsan u Principal Secretary u PS Thangkhiew la ong ba hapoh ka Right To Education (RTE) ki khynnah skul ki dei ban leit skul ha kato ka jaka ba ki sah bad kin ioh ei ia ka sopti uniform, kot, khulom, bad kiwei kiba ka sorkar ka ai katkum kane ka ain. Lada ki leit skul shabar na ka jaka ba ki sah, kin ym ioh satia ia ki kot ki sla, ki kopi, ki sopti bad ki hap ban thied hi”, la ong u Bah Thangkhiew
U la ong ruh ba ha kane ka RTE, ki nonghikai lada kim trei hok ia ka kam bad lada ki don ki nonghikai ki bym pat biang ka kyrdan pule, ki kmie ki kpa ne kino kino ki lah ban ujor pyrshah ia kita ki nonghikai bad kin sa duh kam beit khlem jingmap namar ba ka dei ka ain. “la don 17 hajar ngut ei ei ki nonghikai la phah pyntbit biang ha ka kam hikai ha ka jylla”, la ong u Bah Thangkhiew.
U la iathuh ruh ba lyngba kane ka RTE, baroh ki skul kiba ioh jingiarap na ka Sarva Shiksha Abhiyan (SSA) hynrei ki bym pat long SSA pura, kin hap kylla SSA lut nadong shadong bad kito ki bym treh, kin ym ioh jingmyntoi shuh na ka SSA.
Ha kane ka sngi, la ioh ruh ia ka jingkren na u DC ka East Khasi, u Secretary ka tnad pule puthi u Bah FR Kharkongor, u director ka DSLE nalor ka jingshad bad ka jingrwai na ki khynnah skul.
Phi don ban ong eiei?