Shillong:U Myntri ba khmih ia ka Kam Jngohkai ka Jylla u la ong ba ka kam jngohkai hapoh ka Jylla ka la kiew stet bah, bad pyntip ba tang ha Sohra haduh 350 tylli ki ïing basa ‘home stay’ ki la don, bad da kane ka jingkiew ka kam jngohkai ka Sorkar ka kwah ruh ba ka jingpynheh ia ka kad liengsuiñ kan sdang noh.
U la ong ba ki la don lypa ki rukom pynïaid na ka bynta ka jingwan ki nong jngohkai khnang ba kan ym don jingthut ne ktah ia ka mariang. U la ong ba ha Meghalaya ym dei ka Sorkar Jylla kaba pyniaid ia ki jaka jngohkai, hynrei la pyniaid da ki kynhun bad ki dorbar shnong, bad dei ma ki ba pynbeit ia ka jingrung ki nongwan kai.
“Ngi kham pylleit jingmut ban khring duna ia ki nongwankai hynrei kiba lah ban pyllut bun ban ia kaba bun tang ki briew hynrei ki bym lah ban pyllut ne siew bun. Ngi la iasyllok ia kiba pyniaid ia ki jaka jngohkai ba kin pyrkhing ia ka jingwan ki nongwankai. Ngi la ai ka jingbthah ba ngi pylleit jingmut ban khot khyndiat ia ki nongwankai hynrei kiba lah ban pyllut. Ha jaka ban pynrung 1000 ngut ki briew da kaba khrong tang T.50, balei ym khrong kaba khem heh ban kham tyngkan ia ka jingwan ki briew, “, la ong u bah Paul.
Katkum ka jingong u bah Paul, ynda la treikam lei sa ka kad liengsuin ha Umroi ban wan dem ki liengsuih heh kiban lah ban kit briew bun, ka kam jngohkai kan nang kiew shuh ha ka jylla.
Ka jingwan tuid ki nongwankai ka la pynsniew ruh shi rukom ia ka mariang namar ba ki wan ban pynjaboh da ki plastic khlem don ka jingkitkhlieh. Halor kane, ki nongpyniaid ia ki jaka jngohkai kum ha ki jaka ba don jingkieng jri, kan bha ba kin shim dor kaba heh ban pynduna ia ka jingwan ki briew katba ka jingioh pat ka bun.
Phi don ban ong eiei?