Ha sngap lok

By Lurstep Nongrum.
Nursing Officer
NEIGRIHMS Hospital Shillong
dept of Medicine ICU

Ha sngap lok ngan kren ia ka jingshisha,
Corona ym dei ka kam shna pisa,
Tangba mad ba Shem ki sngewthuh thikna,
Katno jingkordit bad ka jingsaja.

Ngi ba trei haka tnat ka koit ka Khiah,
Katno jingsangsot ban peit ki ba thiah,
Jingjynjar ban ring bad pynhiar mynsiem,
Ym don ktien ban ong bad ban pynsyriem.

Jingkordit Ki ong ba ki duna lyer,
Wat ban ring mynsiem sngew kum ban iapler,
Wat ban thiah ban shong ym i suk shisha,
Katno corona ia ki pynsaja.

Hynrei ki bym tip bad ki bym iohi,
Ki ktien hamsaia ruh ki ieng sakhi,
Ki ialeh pyrshah, ia jingim ki pein,
Ia ka ain sorkar baroh ki pynkhein,.

Pyrkhat lem ia ngi ruh ki nongsumar,
Ban phong PPE katno jingjynjar,
Sngew kum ha dujok jingkhluit bad Jingsyang,
Hynrei ngi iai shah Wat la ding ka klang.

Sngew thik kumba ieng ha ka madan thma,
Ngi tur bad ngi thom la ngi sngew saja,
Ban pynim iaki mynsiem bakordor,
Kumba Blei najrong U la pynkup bor.

Sngap ko lok baieit kam dei ka kamkai,
Bud pyrkhing baroh ain bala batai,
Da Kane ngin jop ka thma Corona,
Lada ngi ia trei lang kum shi para.

Lada phi ia bud ia ki jingbatai,
Ba ka tnat ka koit ka khiah ka hikai,
Phin ym don kam ban tieng ne ban khuslai,
Ngin sa jop ka thma, la bor ngim tyngkai.

Blei ruh U iarap ia ba kum kita,
Ba tip ban iarap ia lade ha shwa,
Kumba ktien U Blei ruh ka ong ia ngi,
Kumta wat pynkhein ki ain jong U hi.

Ha khatduh iawai nga kwah ban kyntu,
Ha jingdwai kynmaw bad to nang kyrkhu,
Nala ing ia ngi to ai bor ma phi,
Ba ngin nang ioh bor ban pynkoit ka Ri.

Khublei Shibun.