Ha shuwa ka ktien Japan, shim khia ïa kiwei ki laiñ jingpule, ong ka KSU ia U SMR

Shillong:Hadien ba u Symbud Myntri Rangbah ka jylla u Bah Prestone Tynsong, ha kine ki khyndiat taïew ba la dep ban ai jing kular ha u Myntri ka sorkar Japan ban shimkhia ban pynthikna ba ka ktien Japan, kan dei kawei na ki ktien kaba yn don ka tnad kyrpang ban ai jinghikai ïa ki samla pule ha NEHU; ka KSU NEHU unit myn hynnin ka sngi, ka la pynpaw ïa ka jing sngew bynñiaw ïa ka jingkloi u SMR ban shimkhia ban pynrung ïa ka ktien Japan ha kane ka skulbah.

Haba kren sha ki lad pathai khubor, na ka liang u President ka KSU u Samla Banlumlang Rani, u la pynpaw ba jin lada u Symbud Myntri Rangbah ka jylla u shimkhia ban buh ïa kiwei ki laiñ pule kiba ym pat don satia ka Post Graduate katba ka Under Graduate ka la don ha ki kolej kum ka MSW bad kiwei de ki laiñ pule.

Haba kren pat halor ka CUET, na ka liang ka KSU ka la ai ka jingpynshai kyrpang sha kito ki samla pule kiba don ka jingthmu ban wad jaka pule ha NEHU kaba la mih ka jingkulmar jingmut khamtam hadien ba ka Sorkar pdeng ka la pyntip ba ki jaka pule ha Meghalaya kim donkam ban ïakhun ïa ka CUET ban ïoh rung pule ha ki kolej ha ka jylla. Na ka liang u Samla Banlumlang Rani, u la ong ba kane ka jingpynlait ka sorkar pdeng ka dei beit thik tang ïa kito ki jaka pule kiba shu pynïasnoh bad ka NEHU hynrei kito ki jaka pule kiba don beit ha NEHU bad kiba ka NEHU ka pynïaid ki donkam beit ban ïakhun ïa kane ka eksamin. Shuh shuh u la kyntu ïa kito ki samla ba kin leh noh ïa ka registration khnang ba kan ym buh jingeh hadien.

Shuh shuh na ka liang ka KSU ka la dawa ba wat la ka sorkar ka bthah ban pynrung beit ïa ki samla pule ha NEHU lyngba ka CUET, na ka liang ka seng pat ka la dawa ba ka bhah kyrpang na bynta ki riewlum jong ka jylla kiba kynthup ïa ki Khasi bad Garo dei beit ban bud kumba la ju leh baroh shi katta.
Na ka liang ka KSU ka la khot la wer ruh ïa ki samla pule jong ka jaidbynriew kiba kwah ban bteng ha ki laiñ pule ha ka Master Degree kiba ym donkam satia ïa ki sobjek pyntbit kyrpang ne specialise subject kum ha Adult and Continuing education, ka Linguistic Department bad kiwei.