Ha shrip ki pulit, ngat u rangbah ha ryngkat u heroin ba T. 4. 8 klur

Nongpoh:Hynnin ka sngi U Blei ha ka por 5 baje ei ei janmiet, ki Pulit ka Ri Bhoi, ki la ioh ban bat ia kawei ka kali kaba don ia u number ML-05-S-9485 kaba kit ia u drok Heroin, ka kali kaba mih na Manipur ban leit sha Shillong bad ha katei ka janmiet ki pulit ki la ioh ruh ban kem ia u nongniah jong katei ka kali bad uba la tip Simtekhan Tluanga.

Katei ka jingioh kurup ki pulit ia utei u drok Heroin, ka dei hadien ba ki la ioh jingtip ba la don kawei ka kali kaba kit drok, kaba mih na Manipur bad kaba thmu ban leit pynpoi ia u drok sha Nongbah Shillong bad dei halor katei ka nongrim, kaba la pynlong ia ki pulit Ri Bhoi ba kin shimkhia bad ban pynap shrip ha Nongpoh.

Ki pulit haba ki la ioh ban bat ia katei ka kali, kaba la shah suba jur ba ka la kit drok, ki la pynlong long ia ka jingtalasi bad kumta ha ka jingkhynra ki Pulit, ki la lap ia 74 ki song sabon, ka la thep da u drok Heroin bad uba shongdor haduh T. 4.8 klur.

Hadien ka jingiohkem ia utei u rangbah, ki pulit ki la dep ban register case bad pynhap katkum ki kyndon ka NDPS Act bad haba iadei bad katei ka jingjia, ki pulit kin dang pynlong ia ka jingtohkit khnang ban lap shuh shuh ia kiwei kiba donkti.