Ha ryngkat ka kali jah u samla na ka shnong Umsawnongkharai ha Ri Bhoi

Nongpoh: Uwei u samla na ka shnong Umsawnongkharai ha Ri Bhoi bad uba la tip kyrteng kum u Romeo Ronghang (19) snem ka rta, u la jah na iing naduh ka 15 tarik mynta u Bnai bad khlem da wanphai iing shuh haduh mynta mynnne.Utei u samla u dei u khun jong ka Kong Meristela Ronghang, na ka shnong Umsaw Nongkharai bad ha katei ka por ba utei u samla u la jah na iing, u la rah ryngkat bad ka kali Maruti Alto kaba don ia u number ML 10 B 8355.

Katkum ka jingiathuh da ka kmie jong utei u samla, la iathuh ba ha katei ka 15 tarik, utei u samla u la mih na iing ha ryngkat bad katei ka kali, da ka jingthmu ban leit sait kali sha Umsamlem, hynrei khlem poi pyrkhat utei u samla u khlem wanphai iing shuh naduh katei hi ka sngi.

Haba iadei bad katei ka jingjah bad khlem wanphai iing shuh utei u samla, ka kmie ha ryngkat bad ki ba haiing ki la ujor ruh da ka ejahar ha Umsning Police Outpost. Nalor ka jingpyntip sha ki Pulit, kiba ha iing ki la kyntu ruh ia ki paidbah kiba iohi ia utei u samla lane ia katei ka kali, ba kin sngewbha ban pyntip sha ki pulit lane phun ban sha u number 6909545317 u number jong kiba ha iing jong utei u samla uba la jah na la iing.