Ha ryngkat bad spah ngut ki nongkyrshan, rung Congress ki nongialam bad nongkyrshan NPP Nongpoh Block

Nongpoh, 01 Naiwieng: Lai ngut ki nongialam ba radbah jong ka National People’s Party (NPP) kiba kynthup ia u Bah Minsing Makri, Adviser ka NPP Nongpoh Block, nangta u Bah Stoin R. Syngkli, Working President NPP Nongpoh bad u Bah Lawrence Nongrum, Secretary barim ka NPP Nongpoh Block, mynta ka sngi ki la pynbna ba ki la mih noh na ka party NPP bad kiba la leit ban pyniasoh noh sha ka Party Congress.
Ia katei ka jingialang pdiang sngewbha ia ki nongialam ka NPP Nongpoh Block lem bad nongkyrshan, la pynlong ha Iing Dorbar Sajer Nongpoh.
Ha katei ka sngi ba kitei ki nongialam ba hakhmat ka NPP Nongpoh Block, ki la pyniasoh sha ka Congress, ki la don ruh shibun kiwei kiba dei ki nongialam ka NPP ha ki shnong bapher bapher bad kiba la pynbna ïalade ba ki la mih noh na ka NPP, da kaba leit ban pyniasoh noh sha ka Party Congress.
Ia kitei ki nongialam ka NPP lem bad ki nongkyrshan kiba la pyniasoh sha ka Congress, la pdiang sngewbha ia ki da u Bah M.G Kharshanlor, President ka Ri Bhoi District Congress Committee (RBDCC), ha ryngkat ka jingdon ka Kong Joplin Scott Shylla, President Meghalaya Pradesh Mahila Congress Committee, u Bah S.W Malai, President ka Nongpoh Block Congress Committee, u Bah Rocky Marwein, Kyrtong Congress na Umsning Constituency lem bad kiwei.
Na ka jingkren jong kitei ki lai ngut ki nongialam ka NPP bad kiba la pynbna ialade ba kin leit pyniasoh noh sha ka Congress, ki la kam ruh ialade ba mynshwa ki dei kiba la sdang ia ka kam politik hapoh ka Congress hi, hynrei ha kine ki khyndiat snem ba la leit, ki la shah ialam bakla bad shah pyngop, kaba la pynlong ia ki ba kin leit pyniasoh noh sha kiwei pat ki Party.
Hynrei mynta, ngi la sngewthuh ba dei tang ka Congress hi kaba lah ban ai ia kata ka synshar khadar kaba khuid bad ka ban ai jingmyntoi ia ki paidbah, dei halor kata ka nongrim ngi la shim ia ka rai ban rung sha ka Congress bad ngi la rai ruh ban pynkhlain ia ka Party ym tang ha Nongpoh, hynrei ha Ri Bhoi hi baroh kawei.
Haba iadei bad katei ka jingwan pyniasoh Congress da kitei ki nongialam NPP Nongpoh, na ka liang ki nongialam ka Congress, ki la pynpaw ia ka mynsiem ba kmen bad ba ki sngew ba ka Party ka la nangkhlain bad ba ki la rai ruh ba nangne shakhmat kin nangpynkhlain shuh shuh ia ka Congress ha Ri Bhoi, kaba dei ruh ka jaka ba ki paidbah ki kham ieid bad kham noh mynsiem sha ka Party Congress.