Ha Rajabala, ki ia sheptieng, ba shah kem 170ngut ki dkhot Congress, ong U Ma Pala

Shillong:U President ka Meghalaya Pradesh Congress Commitee (MPCC) u bah VH Pala u la ong ba ka jingmih jong ki MDC bad ki nongkitkam jong ka party Congress na ka party ban ia khun ia ka election shiteng samoi ka dei ka jingkwah jongki ban pyrshang la ka bok, ym ba don kano kano ka jingiashrut hapoh ka party.

“Ka jingmih jong ki MDC bad ki nongkitkam jong ka Congress na ka party ban ia khun ia kane ka election shitengsamoi kam dei namar ba don ka jingiashrut hapoh ka party, hynrei ka dei tang namar ba ki kwah ban pyrshang ia la ka bok ha ka ne ka election shiteng samoi”la ong u bah Pala ia ki lad pathai khubor ha ka sngi nyngkong.

U la bynrap ruh “Ha ka party Congress kam don kano kano ka jingia shrut, ha kaba na Mawphlang, u MDC u bah Lamphrang Blah bad u MDC na Garo Hills u Ashahel D Shira kumjuh ha Mawrynkneng u secretary ka Congress Block u bah Norbert Marboh ki dei ki nongialam kiba la rangbah bha ha ka party, hynrei ka jingmih jong ki la dei tang namar ba la shah pynthame ha ki party ki ba don ha ka bor”.

U la ong ruh “Ki party ki ba don ha ka bor, haba ki la sngewthuh ba kim lah ban pyniapra ia ka Congress ki la shu pynthame ia ki briew jong ngi haba ngi peit ha kane ka election shitengshamoi lada kam don ka jingpynpra ia ka Vote ka Congress ka la jop da ka ba suk”.

U la ong ba ka jingshah rem kam dei ka jingiashrut hapoh ka party namar ba lada ka don kata ka jing ia shrut, ha ka por ba don ka election kan ym don kano kano ka jingiatrei lang ban ia lap ia kane ka election shiteng samoi.
U bah Pala u la kynnoh ruh ba ha Rajabala ka Sorkar ka la pyntrei kam bakla ia la ka bor, ha kaba hadien ka jing ia kajia ha ka sngi ba ia lap election khadduh ki la kem ia ki nongkitkam ka Congress haduh 170 ngut, ha kaba ki la shoh la dat ki la buh ha along ia ki bad ha ki thain nongkyndong ki paidbah ki sheptieng bad kane ka long tang ia ka liang ki Congress katba ia kito kiwei ki liang ki khlem leh eiei. Nangta ula bynrap, ba ka Rajabala ka dei ka Constituency kaba duna bha ka ioh ka kot ha kaba lada ki pyntrei kam da ka pisa ki paidbah da kaba suk kin ngop.

“Ngam kwah ban ong ba ka dei ka jingiasuh buit jongno jongno ha kane ka jingjia, hynrei ka lah ban dei ka jingshim kabu jong kiwei ki party ha kaba ki la pyndonkam bakla ia ka bor”la ong u bah Pala’.