|
BY MR. ALOYSIUS PAPANG
Ko mei mariang ba da i shongkun eh shi katdei
Ia jing bhabriew jong pha la kyrkhu kyrhai da u Blei
Ha ki pneh ba iar jong pha tang jingieid ka dap ka shlei
Ia jingthaw baroh pha da ri da kdup tang da jing isnei.
Na ki pneh baiar jong pha ngi ia ioh jhur ioh khaw
Pha ri pha bsa kyrhai ia baroh kampher la rit ne khraw
Ha pha bunsien hi jing bishni ne jing pihuin kam judon
Pha kdup lut da jing ieid ia baroh khlem tyngkai la ka mon.
Hapdeng kat ka jingbha jong pha ia u khun bynriew
Dangdon pat ki khawpud ba shlan ia pha ban pynsniew
Um suidniew shuh wat ia ka burom ka iktiar ka jong pha
U nud ban lehtam wat haduh ban da pynjot pynpra.
Da mynsiem ka ba palei pham ju shim la ka kput
Tengkhat eh phan leh dom ban pyneh la ka rngiew
Kat ka jingsbun jingbha jong pha hangno kein ngin ioh
Ha ki pneh jong pha tang jingieid bad jing iaroh.
Ai ba u khun bynriew ia pha da ka jingieid un ri un sumar
Bad ia ka jing itynnad jong pha un nym pynjot pathar
Khnang ba baroh ki pateng ki ban dang wan hadien
Kin ioh pat ban mad ia ki jingkyrkhu jong pha sa shisien
Kane ka dei ka poitri ba la phah da U bah Aloysius Papang, kaba ula pule ruh ha ka jingialang jong ki nongthoh poitri ha ki khyndiat taiew ba ladep ha Andhra Pradesh.
|